Who The (Bleep) Did I Marry?
Seisoen 6 ID (*252) 21:00 Realiteit
Het jy al ooit gevoel jou lewensmaat kom uit ’n ander wêreld? Moenie alleen voel nie. Die meeste mense met wie onderhoude gevoer is vir die dokkiereeks Who The (Bleep) Did I Marry? is vroue wat ontdek het hul geliefdes het hulle nie net mislei nie, maar is baie dikwels misdadigers, moordenaars, swendelaars en selfs erger . . .
“Dis verstommend om stories te hoor wat so intens is en eerlikwaar klink asof dit vir ’n Hollywood-fliek uitgedink is,” verduidelik die verteller Jacqueline Hennessy, wat al kleiner stil-rolle in flieks gehad het. “Seisoen 6 is tot dusver die donkerste, want die mense wat onder die loep is, is deur en deur monsters. Daar’s ’n 17-jarige meisie wat met ’n man twee keer ouer as sy begin uitgaan nadat sy hom by ’n sagtebalwedstryd ontmoet het . . . en hy maak in die geheim video-opnames van haar wat hy aanlyn verkoop. Dis skrikwekkend,” voeg Jacqueline by.
Seisoen 6 is in 2015 gemaak, dus sal dit ’n bietjie oud voel, maar dit word nou uitgesaai in die aanloop tot die splinternuwe seisoen 7, wat volgens die verteller plofbaar is. “Ons het van episodes van 30 minute tot uur lange episodes oorgeskakel. Dit gaan kykers verras, want dit het nou meer in diepte, ons het nuwe navorsers en kenners in die span wat dit makliker maak om die mense (in die reeks) te verstaan,” vertel Jacqueline. “Ons het ook nuus oor van die oorspronklike gaste, so dis ’n heel goeie pakket. Almal wil weet hoe gaan dit met die vrou wat ontdek het sy gaan met ’n reeksmoordenaar uit. Ons moet dit verken!”