DIE BABE VAN BABES!

Julia en die skryfspan het hul eie lewens gebruik as inspirasie om Tali se seun in die perfekte kleuterskool te kry. “Ek en my man het ons kinders na ons plaaslike skooltjie gestuur en dit was regtig nou nie ’n storie om plek te kry nie, maar dit is iets waarmee baie ander ouers sukkel. Daar is nogal baie komedie om te ontgin rondom daardie onderwerp: Van om jou kinders in dié perfekte kleuterskool te kry tot die wedywering om die ClassMom (in Tali se geval is die ma-klaskaptein Monique, gespeel deur Sharon Spiegel Wagner), te wees. ’n Baie spesifieke persoon is gewoonlik die klas-ma. Dit lyk dalk onbenullig, maar ek weet dit is nie, dis egter juis die halwe belaglikheid wat dit snaaks maak. Jy weet, daardie boodskappe wat die klas-ma moet stuur soos: ‘Onthou asb. dis pajama-dag.’”

Die skrywers moes ook onthou hulle werk met kinders. “Ons het almal kinders, so ons het dit in ons agterkoppe gehad. ‘Sal ons kinders verstaan wat om te doen?’ (wat van die kinderakteurs verwag word). In die skryfproses suggereer ons dus meer kinders pleks van hulle te wys (soos deur klanke te gebruik wat jou laat dink ’n kind is in die agtergrond). Wanneer daar kinders was, het ons dit eenvoudig gehou en al hul tonele op een slag verfilm.

“Ons moes dikwels net daar iets oorskryf want ons was oorambisieus met van die tonele,” erken Julia.

“Ons het ’n kinderkunsveilig as fondsinsameling en daar was baie veranderlikes. Die dag voor die verfilming het ons besluit die kinders gaan liefs nie na die veiling genooi word nie (behalwe een meisietjie). Nog ’n moeilike stuk was die skoolkonsert. Dit het nie gewerk soos ons wou nie, toe laat ons maar die kinders speel en hou aan verfilm en sny dit in tonele wat by die styl van die program gepas het.” Julia klink of sy weet wat sy doen, maar ons sien Tali is dalk ouer, maar beslis nog nie wyser nie . . .