Man van vele talente
Melt Sieberhagen vestig sy naam voor en agter die skerm.
Fraksie
Seisoen 1 Dinsdae kykNET (*144) 20:00
Voordat die akteur Melt Sieberhagen die rol van Henk in die dramareeks Fraksie gekry het, was hy ’n lid van die skryfspan. “Terwyl ons aan die reeks geskryf het, het ek nooit gedroom ek sou een van die hoofrolle, Henk, kry nie,” vertel hy. Maar toe hy die rol kry en voor die kameras begin werk, het hy besef hy sit nou op ’n ander stoel. “Ek het geweet ek moet voortaan net op die vertolking van my eie karakter fokus.”
KOMPLEKSE KARAKTER
Henk is ver verwyderd van die vorige karakters wat Melt vertolk het. Henk was hoof van IT by die maatskappy T&M Holdings en Schalk (Edwin van der Walt) het sy arm gedraai om in die maatskappy QPI te belê. Hy is geskei en sy 19-jarige seun JP (Hendrik Nieuwoudt) woon saam met hom en ’n vriend, Donovan (Brendon Daniels), ’n geleentheidsbeplanner. “Henk is ’n regte korrelkop en iesegrimmig. Hy lewe in ’n binêre wêreld van 0 of 1 en raak vreeslik gefrustreerd wanneer sake nie vlot verloop nie.
Hy het uiteraard nie goeie menseverhoudinge nie,” gesels Melt oor sy karakter. “Wanneer JP by hom kom bly, is hy nie antagonisties teenoor hom nie; hy weet net nie hoe om die outjie te hanteer nie. Hul verhouding verbeter wel mettertyd.” Donovan en Henk het ook ’n komplekse verhouding. “Donovan het Henk, wat in sak en as ná sy egskeiding en ’n mislukte sakegeleentheid was, ’n heenkome gebied. Hy het ’n kalmerende effek op Henk se soms onstuimige gemoed.”
GULDE GELEENTHEID
Melt wat al saam met die vervaardigers Louis Pretorius en Albert Snyman voor die kamera gewerk het in die romkom Troukoors (Nathan, beskikbaar op Showmax) en die drama Fynskrif (Marco, ook op Showmax), sê dit was ’n gulde geleentheid om saam met die hoofskrywer Louis Pretorius en twee ander gesoute skrywers, Stephen Simm en Rosalind Butler, aan Fraksie te skryf. “Dit was wonderlik om te sien hoe Louis alles bymekaarbring. My skryfwerk neig na die minder ernstige kant en dit was ’n goeie leerskool.”
KOMEDIE SY KOS
Melt het in 2001 sy honneursgraad in drama aan Tukkies (Universiteit van Pretoria) voltooi. Hy het in die TV-bedryf agter die skerms as navorser vir die tydskrifprogramme Kwêla en Kunskafee begin werk en in 2003 was hy insetselregisseur. “In 2006 het ek standup- komedie begin doen.”
Talle mense herken hom vir sy deelname aan die improvisasiekomedie Proesstraat (2010-2016).
Toe was sy handelsmerk sy lang, blonde lokke. “Ek en die regisseur Harald Richter het in een episode in 2013 saam met die gas, Hannon Bothma, van die leefstylprogram Glam Guru saamgesweer, my hare sal moet waai. Maar wyle Elize Cawood, die spelleier, en Pierre Breytenbach, wat ook aan die reeks deelgeneem het, het nie gedink dit is snaaks nie,” onthou hy.
HUWELIKSKLOKKIES
Melt en sy verloofde Maryke Nel, wat kostumering vir plaaslike en internasionale produksies doen, het hulle drie jaar gelede in Drieankerbaai in Kaapstad gevestig. Die huweliksklokkies lui in Maart in die Robertsonvallei vir die paartije. Hy skryf ook deesdae tekste vir die leefstylreeks Wanderlus (seisoen 2 word tans op Saterdae om 19:30 op kykNET uitgesaai) “Ek is dankbaar dat ek ná 20 jaar steeds in die bedryf kan werk. Twee jaar terug tydens die Covid-pandemie en die inperking was ek maar ’n bietjie mismoedig. Maar nou kan ek weer met nuwe moed, dankbaarheid en vreugde sê: ‘Ek is nog hier’!”