KOSBAARHEDE
Hannes is dol oor glas, van kroonkandelare (waarvan die meeste deur sy beste vriend die kunstenaar Riaan Chambers, van Riaan Chambers Chandeliers in Muizenberg gemaak is), tot spieëls en memento’s. “Ons het ’n paar jaar gelede op ’n passasierskip verfilm en vir ses weke ’n trippie van Venisië af gedoen, dus het ek baie glas daar gekoop. My huis is vol storietjies, dinge wat ek onthou of plekke wat ek besoek het.” Soos die
Art Deco-beeld van ’n dansende paartjie in die ingangsportaal wat in Frankryk sy aandag getrek het. “Ek dink dis omdat dit so teatraal is,” verduidelik die akteur.
Hannes se huis is vol liefdesblyke deur vriende, soos die vergulde porselein-koffiepot wat hy ná Christine Basson (wat Nora in Egoli gespeel het), se dood in 2019 geërf het – wat reg langs ’n koffiepot van sy ma staan – en sy liefde en bewondering vir albei vroue toon.
Horlosies weergalm reg deur die huis tydens ons besoek. “Ek is ’n bietjie horlosie-bedinges,” erken Hannes. “Hier is selfs horlosies van my oorgrootouers.” En terwyl die horlosies die minute aftik, speel ’n instrumentale opname van die ou liedjie Once I Had A Secret Love saggies iewers in die huis en eggo die vergange glorie van Hannes se versameling plakkate en foto’s van toeka se Hollywood-sterre, soos
Paul Newman, Liz Taylor en Audrey Hepburn. Hannes se eie loopbaan word gevier met plakkate, teaterprogramme en foto’s in sy dakkamer, en ook sy karakter Krynauw in die sepie Egoli, Plek Van Goud se spoggerige leerkantoorstoel uit sy 10 jaar by die sepie. Dit huldig ’n droom wat bewaarheid is.
“Ek het eers in my eerste jaar op universiteit na die teater gegaan, want ek het op die dorpie, AliwalNoord, in die Oos-Kaap grootgeword. Maar ek wou al as ’n seuntjie graag ’n akteur word. En my ouers, veral my ma, het gesê: ‘Jy kan doen wat jy ook al wil my kind, ons sal ’n plan maak.”