Tien boere se soektog na pasmaats
Nuwe liefdesverhale, dramas en intriges ontvou.
Boer Soek ’n Vrou
Seisoen 15 kykNET (*144) Donderdae 20:00 (begin 19 Januarie)
Ons was reeds tydens 14 seisoene van Boer Soek ’n Vrou deel van die lief en leed van tientalle boere wat na liefde op soek was, en talle mooi suksesverhale het ons almal se geloof in ware liefde herbevestig. Die nuwe seisoen gaan net soos die voriges vol hope verrassings en opwinding wees en neem ons op ’n nuwe reis van selfontdekking, hoop en selfs toekomsdrome wat verwesenlik word.
BEPROEFDE RESEP
Elmarie Botha, wat sedert die eerste seisoen vervaardiger van hierdie maatsoekreeks is, sê die egtheid van Boer Soek ’n Vrou maak dit een van die gewildste en langdurendste realiteitsreekse in Suid-Afrika. “Die reeks is nie scripted reality nie en ons plaas nie woorde in die deelnemers se mond of hits hulle teen mekaar aan om drama te ontketen nie. Ek dink die kykers voel die opregtheid van die boere en deelnemers se ware gevoelens aan.”
Die nuutste seisoen volg weer die beproefde formaat. “Dit is ’n internasionale formaat, so ons kan nie juis daaraan torring nie.
Ons moes wel weens die Covid-19pandemie by die regulasies hou en ’n paar aanpassings tydens die afgelope twee seisoene maak.
Daar was byvoorbeeld nie speed
dating nie en die groot groep vroue se ontmoeting met die boere nie. Maar ons het met hierdie seisoen na die oorspronklike konsep teruggekeer. Dit is egter belangrik dat elke seisoen sy eie identiteit het, wat gelukkig deur die boere en deelnemers se uiteenlopende persoonlikhede bepaal word.”
Boer Soek ’n Vrou het verskeie mooi liefdesverhale. “Daar is sowat 23 suksesverhale van boere wat liefde gevind het. En jaarliks kom nog een of twee by – en dan kry hulle natuurlik ook kinders. Ons is trots op die ware liefde waartoe die reeks lei.”
Wat die keuringsproses betref, word die deelnemende boere deur en deur op hul uiteenlopende persoonlikhede gekies, verduidelik Elmarie. “kykNET doen talle oudisies om die finale keuses te maak. Die uiteindelike provinsies en dorpe waar die boere woon, word nie vooraf bepaal nie en is selfs vir ons ’n verrassing.”
LOCAL IS LEKKER
Marciel Hopkins, wat vanjaar die derde keer die reeks aanbied en die boere tydens hul reis op soek na die liefde ondersteun en vergesel, sê die nuwe seisoen se boere is meesal ekstroverte en uitgesproke. “Dit sorg vir lekker persoonlikheidsdinamika, opwinding en drama wat al so ’n kenmerkende bestanddeel van Boer Soek ’n Vrou is.”
Marciel sê daar is meer as een rede waarom die reeks steeds relevant en gewild bly. “Boer Soek ’n Vrou gee ons ’n kykie in die boere se lewe en ons nalantenskap. Die reeks is verteenwoordigend van Afrikaans en wie ons is en van ons kultuur, iets waarop ons trots is en wil laat voortbestaan. Nóg ’n rede waarom
die reeks al so ’n lang raklewe het, is omdat dit wérk. Al het die reeks elke jaar dieselfde resep, het dit die toets deur verskillende geslagte deurstaan en mense is steeds opgewonde daaroor.”
Die vryheid van keuse speel ook ’n belangrike rol, sê sy. “Die meisies wat vir die boere skryf, skryf omdat hulle in daardie spesifieke boer belangstel en ons keur hulle nie voor die tyd nie. Daar is ’n totale vryheid van keuse, en dieselfde geld wanneer die boere uiteindelik hul pasmaats kies.”
Dis nie net jongelinge wat verlief kan raak nie, voeg sy by. “Die vyftiende seisoen het heelwat verrassings en het mooi stories van hoop en liefde. Die reeks wys weer daar’s altyd ’n tweede of selfs derde kans om liefde te vind en dat die liefde geen ouderdomsperk het nie.”
DIE PAD VAN DIE LIEFDE
Marciel sê sy glo nie daar’s noodwendig iets soos liefde met die eerste oogopslag nie. “Ek glo wel daar is iets soos ’n soul connection wat mense na mekaar aantrek en ’n chemistry tussen twee mense.” Hoewel sy so ’n bietjie Kupido vir die boere en die deelnemers speel, sal sy nooit eksplisiet vir die boere keuses maak nie. “Ek is bloot die bemiddelaar en hulle moet self die beste persoon kies wat by hulle pas. Ek raai hulle wel aan om heeltyd oopkop te bly. Dalk het hulle aanvanklik ’n voorgestelde idee van wie die regte keuse gaan wees, maar wanneer die meisies eers op die plaas kom kuier, kan hulle heeltemal van siening verander. Elkeen moet self deur al die emosies en die wipwarit gaan. In die proses leer hulle ook baie van hulself en wat hulle presies in die lewe en ’n lewensmaat wil hê,” sê Marciel wat elke tree saam met die deelnemers stap en in elkeen se lief en leed deel.
Maar uiteindelik, glo sy, sal die liefde seëvier.