Nóg spore uitgevee
Genevieve teiken vir Delia wat krap waar dit nie jeuk nie.
Genevieve Lee (Delia Pereira), die bose hoof van die Chironhospitaal, die Binnelandkliniek se grootste mededinger, se korrupte dade is besig om haar in te haal. Eers het sy vir At (Hans Strydom) in Desember verlede jaar probeer doodmaak om haar spore dood te vee nadat sy miljoene gesteel het wat vir die bou van ’n hospitaal in Nigerië bedoel was, en nou is Delia (Odelle de Wet), die hospitaal se administrateur, op Genevieve se radar wanneer Delia besef Genevieve verduister geld.
GELD IS GESTEEL
Alles begin wanneer Delia Genevieve vertel KL Properties word deur die Suid-Afrikaanse Inkomstediens geouditeer en Genevieve haar asvaal skrik. Vir dié wat nie weet nie: At en Genevieve het destyds KL Properties gestig toe hulle saam by Chiron gewerk het. Chiron, asook Genevieve en At in hul persoonlike hoedanigheid, het geld in KL Properties belê om hul droom-oorplantingseenheid te bou.
“Delia sien iets is verkeerd wanneer sy die nuus aan Genevieve oordra, maar lees nie te veel daarin nie. Volgens haar is die oudit net ’n formaliteit,” sê Odelle. Maar Delia weet nie Genevieve het geld by KL Properties gesteel nie . . .
OMGERY!
Delia sê vir Genevieve sy het met die finansiële bestuurder gepraat om die nodige dokumente oor die besigheid vir die taksman te kry. “Terwyl sy na KL Properties se bankstate kyk, kom Delia op ’n buitensporige groot uitgawe af. Sy konfronteer Genevieve daaroor, maar Genevieve lieg en sê sy weet niks daarvan nie. Delia het egter bewyse van die finansiële bestuurder dat Genevieve die geld onttrek het,” verklap Odelle.
Delia soek antwoorde en Genevieve erken uiteindelik sy het geld by KL Properties gevat om dinge reg te stel nadat ’n belegging vir ’n Chironsustershospitaal in Hongkong nie uitgewerk het nie, en sy al die geld verloor het toe die projek doodloop. “Delia kan nie glo hoe Genevieve alles onder hul neus gedoen het nie,” sê Odelle. En op daardie oomblik besef Genevieve: Delia weet te veel en sy moet van haar ontslae raak!
Later vertel Delia haar vriend, dr. Steve (Clint Brink), sy dink Genevieve verduister geld. “Steve is besorg oor Delia, maar weet nie of hy haar alles kan vertel wat hy van Genevieve weet nie,” sê Odelle. En dan word Delia deur ’n motor omgery en beland in ongevalle by Binneland!
ONTHULLINGS
Wanneer Delia wakker word, is Steve aan haar sy en hy blaker alles uit wat hy van Genevieve weet: Dat At sy probeer doodmaak het en hoe Genevieve waarskynlik nou vir Delia wou vermoor. Genevieve stap later by Delia se privaatsaal in terwyl Conrad (Hykie Berg) vir Delia vertel die versekering vir die Super ER – die ongevalle-eenheid wat hulle op At se grond wou oprig, maar waar ’n ontploffing was – gaan wel uitbetaal, en Genevieve besef dis ’n geleentheid om nóg geld in te palm!