Daai Crazy Somer
Weekdae e.tv (*194) 17:30 Telenovelle
Die gesoute akteur Jacques Gombault, bekend vir sy rol as die bose Jonas in die sepie Binnelanders (lees meer op ble. 18, 19 en 45) doen al oorklankingswerk sedert sy loopbaan in die vroeër 1990’s begin het. “In my jonger dae het ek oorklanking vir animasiereekse en Bybelfilms vir kinders gedoen.
Die manier hoe jy lip sync, soos hulle in Engels sê, moes doen, was ’n uitdaging. Maar hoe meer ek dit gedoen het, hoe beter het ek geword,” sê Jacques.
Jacques se suiwer en warm stem word tans gehoor in die nuwe
Turkse telenovelle Daai Crazy Somer, weekdae op e.tv (*194), as die hoofkarakter Selim Kara (Ali Atay). “Selim is ’n staatsaanklaer en ’n baie reguit man, hy sê ’n ding soos hy is,” sê Jacques. “Sy werk was nog altyd ’n ontvlugting vir hom, maar wat hy nie besef nie, is sy werk is besig om sy huwelik te verwoes, want hy is meer by die werk as by sy gesin.”
Jacques sê om stemwerk te doen, is ’n vorm van kuns. “Dis belangrik om die vokale en konsonante reg uit te spreek dat dit pas in die akteur se mond op die skerm, en dan moet jy ook nie leserig oorkom nie,” sê Jacques. Hoe jy emosies oordra, speel ook ’n rol. “Dit verg harde konsentrasie om die regte emosie slegs met jou stem oor te dra. Ek onthou in een toneel moes ek huil, maar ek het net een kans gehad om dit reg te doen en op te neem. Dit was nie maklik nie, ek moes konsentreer en diep delf.” En gaan ons Jonas binnekort weer sien? “Verseker,” verklap Jacques. “Hy gaan iewers in die jaar weer lekker amok maak in Binnelanders! • Lees meer oor Daai Crazy somer op bl. 26.