Jol Met Ricky
Seisoen 1 kykNET & kie (*145) 19:30 Realiteit
In kykNET & kie se speletjiesprogram Jol Met Ricky, word goed gejol! Ricky Schroeder, ’n oudrugbyspeler en vloerbestuurder van die kletsprogram Tussen Ons, is die aanbieder en die aktrise Hunter Plaaitjies die platejoggie. Saam sorg hulle vir ’n prettige produksie waarin bekendes skreeusnaakse speletjies teen Ricky speel. Al wat jy kan wen, is om te spog jy het hom uitoorlê, maar dit is op sigself ’n prys!
Hunter (26), wat kykers sal herken as die minsame leerder Saartjie in die telenovelle Arendsvlei (lees meer op ble. 20 en 21), sê sy was deel van die ontwikkeling van die program en was dus nie so senuweeagtig op haar eerste dag op die stel nie. “Ons het goed voorberei, so ek het geweet wat om te verwag,” sê sy. “Dit was net toe ons die eerste segment verfilm het wat ek so ’n bietjie nervous was, maar daarna was ek gemaklik.”
Hunter het die platejoggie-kuns tydens haar studentedae op Stellenbosch geslyp, waar sy by Maties FM as omroeper betrokke was. “Ek werk tans by KFM in die programming
department,” sê Hunter. “The dream is to have my own show one day.”
Hunter bestuur ook haar eie besigheid wat die fraaiste hoede en mussies maak. “My besigheid se naam is Bedecked, wat in Engels beteken to decorate en in Afrikaans om jou hoof te bedek,” vertel Hunter.
“Ek is dol oor hoede en dink dis the
most versatile accessory wat jy in die somer én winter kan dra. Meer info is op my Instagram-blad beskikbaar.”
En gaan ons Saartjie dalk in die toekoms weer in die Vlei sien? “Die kans is goed, watch this space,” sê Hunter.