Delf in die skaduwee

Van gesteelde menslike organe tot gedeporteerde bendelede, Mariana van Zeller volg die fluisteringe van grustories in ’n nuwe seisoen van Trafficked.

Trafficked With Mariana Van Zeller Seisoen 3 Donderdae National Geographic (*181) 21:00 (begin 9 Februarie)

Oor jare van verslaggewing oor die wêreld se gevaarlikste en geheimsinnigste onwettige netwerke, het die gesoute ondersoekende joernalis Mariana van Zeller van aangesig tot aangesig gekom met almal van kokaïenkartelle, koppelaars en wit heerssugtiges tot wapensmokkelaars. Maar wanneer seisoen 3 van haar dokkiereeks Trafficked begin, deins sy steeds merkbaar terug wanneer ’n handelaar in menslike organe met die bynaam “The Wrecker” (soos iemand wat motors afbreek in ’n skrootwerf) in Medellín, Colombia, haar bewyse van die Clan del Golfo-kartel se nuwe “operasie” op sy selfoon wys. In sy video sien sy hoe hy organe uit ’n menseskenker slag. Wat sy sien, word ’n draad wat sy deur ’n doolhoof van gruwels volg.

ONS PRAAT NIE DAAROOR NIE

Wrecker vertel Mariana skenking is nie altyd vrywilliglik nie. En skenkers is nie altyd bewusteloos tydens die prosedure nie. Dit lyk asof dié twee feite die geharde kartellede met wie sy praat, ineen laat krimp – asof Mariana onbetaamlik was deur dit te noem. Later haas selfs haar Mexikaanse kartelkontak, “Paloma”, om hul kartelhoof se woordvoerder – wat per selfoon met hulle uit die tronk praat – stil te maak wanneer Mariana dié besonderhede probeer bevestig. Paloma berispe die woordvoerder en sê vir hom “mense verdwyn”. “Dis ’n donker en gevaarlike bedryf dié. Mense word (soms) doodgemaak omdat hulle uitpraat. Paloma verifieer dat al die inligting wat sy ons gee die toestemming het van die hoof van dié bedryf, wat in dié geval die ou in die tronk is. Paloma mag net die inligting gee wat die kartelhoof toegelaat het. Wanneer ookal geld gemaak word, en mense beskerm daardie geld, raak dit gevaarlik om daaroor te praat,” sê Mariana.

In Nigerië wys Mariana hoe olie uit die wurggreep van wêreldkoöperasies ontsnap om terreurorganisasies soos Boko Haram aan te vuur.

Selfs Mariana se bronne, soos Paloma, lyk asof hulle die skrik op die lyf gejaag word deur orgaanhandel.