Skud die kilo’s af!
Ses deelnemers is slaggereed om die vetrolle te laat wegsmelt in ’n nuwe gewigsverliesprogram.
Die Groot Afskud Seisoen 1 Dinsdae VIA (*147) 20:00
“Die program gaan oor meer as net gewigsverlies; dis ’n leefstylverandering,” sê die bekende TV-aanbieder en voormalige beroepsnetbalspeler Vanes-Mari du Toit, aanbieder van die nuwe realiteitreeks, Die Groot Afskud, op VIA.
Vanuit duisende inskrywings vir die reeks het die vervaardigers ná groot kopkrap ses deelnemers gekies wat die geleentheid kry om binne ses maande die skaal se naald te laat daal.
“Die deelnemers word in twee spanne van drie verdeel en die span wat die meeste gewig in daardie tydperk verloor, wen die groot prys van R300 000 (R100 000 per deelnemer), en ’n jaar se voorraad van USN- (Ultimate Sports Nutrition) produkte,” sê Vanes-Mari.
“Met die hulp van drie kenners gaan die ses deelnemers op ’n ongelooflike reis wat hul lewens onherroeplik gaan verander, en die veranderinge wat ons aan die einde van die reeks sien, gaan verstommend wees,” belowe Vanes-Mari.
DIE UITDAGINGS
Aanhangers van die Amerikaanse gewigsverliesprogram The Biggest Loser, sal Die Groot Afskud baie geniet omdat sy formaat iets soortgelyks is. “Dit het beslis ’n Biggest Loser- vibe, maar ons het dit meer Suid-Afrikaans gemaak met unieke temas en uitdagings.”
En so gepraat van uitdagings – die spanne kom elke twee weke by die Farmhouse Fitness-gimnasium in Kaapstad bymekaar waar hulle geweeg word. “Die deelnemers kom van reg oor die land, dus het van hulle gery of gevlieg om die weegsessies by te woon,” sê Vanes-Mari. Die spanne neem ook aan uitdagings deel wanneer hulle bymekaarkom, soos om hul totale gewig in houers van een punt na ’n ander punt te dra (episode 1, op DStv CatchUp beskikbaar). Daar is tydens die uitdagings ook ander pryse op die spel, soos geskenkbewyse en wegbreekvakansies. Die kenners – die dieetkundige Minette Röth, die fiksheidsinstrukteur Olivia Losper en die sielkundige Dewald Louw – wat die deelnemers ondersteun en help tydens die ses maande lange reis, loer gereeld by die deelnemers in terwyl hulle hard probeer om hul lewenswyse te verander.
Kyk dit gerus, soms kry jy sommer trane in jou oë. En wie van ons verstaan nou nie die gesukkel om die kilo’s te klop nie?