Mis voor die son
Matthew Macfadyen neem ons in die gedagtes van die Britse LP wat sy dood op ’n strand in Miami geveins het.
Stonehouse
Kyk Stonehouse nou op BritBox.
In 1974 het die hoëprofiel Britse LP John Stonehouse vanaf ’n strand in Miami, Florida, verdwyn. Hy het sy vrou, Barbara, drie kinders en ’n belowende politieke loopbaan agtergelaat. Maar die gewetenlose LP het nie verdrink of is deur haaie gevreet nie. In die spannende BritBox oorspronklike drama Stonehouse, ontrafel die draaiboekskrywer John Preston die waarhede wat stadig aan die lig gekom het nadat die Australiese polisie ’n man genaamd Clive Mildoon gearresteer het . . . menende hy is Lord Lucan, die moordenaar van ’n kinderoppaster. (Sien verduideliking in kassie)
Die daaropvolgende dramatiese storie van Stonehouse se gevangeneming en terugkeer na die politiek was aas vir die Britse pers. Selfs dekades later noem Preston die Stonehouse-sage “een van die bisarste ware lewe verhale wat ek ooit teëgekom het”.
Die Emmy bekroonde akteur Matthew Macfadyen (Succession, Pride and Prejudice), wat die rol van John Stonehouse speel, grawe diep in die man en sy komplot om ’n dooie man se identiteit te steel . . .
DIE MAN
“Ek is gebore ’n maand voor John Stonehouse sy dood in November 1974 geveins het,” sê Matthew. “’n Mens weet nie wat sy motivering was nie, maar daar is parallelle met huidige politici. ’n Ontkoppeling tussen hulle wat hul werk doen en hul idee van hulself. Daar is ’n reël wat Barbara sê: ‘Die moeilikheid met jou, John, is jy wil altyd iemand wees wat jy nie is nie.’”
Soms was daardie man ’n James Bond-styl spioen, wat vir die Tsjeggiese Republiek werk. Soms was hy ’n toegewyde gesinsman. Soms ’n man verstrengel in ’n vurige affair met sy sekretaresse, Sheila Buckley (Emer Heatley). Maar soos Stonehouse geknak het onder die eindelose kritiek in die politieke kollig, en finansiële probleme begin het, het hy ineengestort. “Ek dink dit vind weerklank in vandag se gebeure. Ek is seker dis waar van baie politici. Daar is geen plek om te ontsnap of weg te kruip nie. Dit ontbloot al jou foute genadeloos. Dit het net te veel geword,” sê Matthew.
TOTSIENS, WREDE WÊRELD
“Ek het dit vertolk asof hy op die rand van ’n senuwee-ineenstorting was – hoewel, soos sy vrou later uitwys sodra hy weer verskyn, indien hy ’n senuwee-ineenstorting gehad het, het hy alles goed vooraf beplan. Daar is ’n buitengewone toneel wanneer hy sy familie groet en vertrek op ’n sakereis na Miami, sonder dat hulle weet dis bedoel om vaarwel te wees. Dit was moeilik om daardie toneel te speel,” sê Matthew. “Ek dink hy het besef wat die menslike offer was van wat hy gedoen het. Dit moes in elk geval so ’n yslike ding gewees het om te oordink, hy het dit dalk in sy gedagtes begrawe het.”
MEESTERLIK VERMOM
Vandag lyk die Stonehouseverdwyning belaglik eenvoudig. “Hy het ’n paspoort gekry om die identiteit van een van sy oorlede kiesers aan te neem, met die idee om ’n nuwe lewe met Sheila in Australië te begin,” sê Matthew. “Dis daardie vermetelheid. ’n Soort ydelheid, wat ek fassinerend vind. ‘Ek gaan dit net doen – dit gaan werk.’ Dit was baie makliker om destyds te verdwyn, toe nie een van vandag se moderne kommunikasiemiddele bestaan het nie. Brittanje en Australië was letterlik wêrelde uitmekaar. Sy enigste vermomming was om die paadjie in sy hare na die anderkant te verander.” En tog het dit gewerk. “Hy is slegs in Australië opgespoor omdat iemand gedink het hy is Lord Lucan, ’n Britse tydgenoot wat ook verdwyn het. Andersins sou hy daarmee weggekom het. Wie weet?” sê Matthew.