Bob Hearts Abishola
Seisoen 4 1Magic (*103) 18:00 Komedie
Die romkomreeks Bob Hearts Abishola keer terug vir seisoen 4 en daar is ’n paar groot veranderinge . . . soos Billy Gardell se hoofkarakter Bob wat sy pos as HUB van die familiebesigheid Sockman heroorweeg.
“Dis ’n groot storie want Bob besef iets skokkends,” sê Billy, wat ook die reeks se uitvoerende vervaardiger is. “Bestuur hy Sockman omdat hy wil en dit hom gelukkig maak, of uit pligsbesef? Dié vraag verander hom.”
Maar daar’s drama tuis wanneer Bob sy besluit bekend maak, want sy liefie Abishola (Folake Olowofeyeku) is ’n tradisionele Nigeriese vrou en behoort ’n sê te hê in dié soort ding. “Sy is woedend omdat Bob haar nie geraadpleeg het nie, haar mening gevra of met haar daaroor gepraat het nie – hy het net ’n besluit geneem en Abi moet daarby inval. Dit gaan wrywing veroorsaak.” Maar daar’s nóg drama op pad . . . uit die hiernamaals. “Ek kan nie wag dat kykers sien hoe Bob se oorlede pa se gees hom besoek nie. Dit verander so baie van wat ons reeds weet en ook nog nie weet nie,” sê Billy.
Die hoofakteur is oor nóg iets bly – hy het sy skraler figuur behou ná ’n klomp harde werk. “Die moeilikste deel was nie om gewig te verloor nie. Ek was vir baie jare ’n grap omdat mense my as die snaakse vet outjie beskou het,” vertel Billy. “Ek het tipe 2-diabetes ontwikkel en het meer as 200 kg geweeg. Ek het ook Covoid-19 gekry, wat dinge vererger het. Ek het bariatriese gewigsverlieschirurgie gehad en ’n persoonlike afrigter gekry wat my gehelp het om fiks te word. Ek voel soveel gesonder en kan nou my voete sien.”