Ongebakte avokado-yskastert
Genoeg vir 6-8
Bereidingstyd 30 minute plus stoltyd
As jy eers hierdie “kaaskoek” geproe het, gaan jy dit weer en weer wil maak. Jy kan die lemmetjiesap en -skil vervang met ’n halwe koppie (125 ml) suurlemoensap plus die fyngerasperde skil van een suurlemoen.
Jy benodig
• 1½ koppie (375 ml) room
• ¾ koppie (180 ml) suiker
• 1½ avokado
• 170 g roomkaas
• sap en fyngerasperde skil van 4 lemmetjies
• ’n knippie sout
VIR DIE KORS
• 1½ koppie (375 ml) koekiekrummels (verkieslik sjokoladesplinterkoekies)
• 3 eetlepels (45 ml) suiker
• 6 eetlepels (90 ml) sagte botter
Só maak jy
Verhit die room en suiker saam en roer dit tot die suiker opgelos het – dit moenie kook nie. Haal dit van die plaat af en laat die mengsel afkoel voordat jy dit in die yskas sit om heeltemal koud te word.
Voer die boom van ’n losboomkoekpan (20 cm in deursnee) met bakpapier uit. Pols die koekies vir die kors in ’n voedselverwerker tot dit fyn krummels vorm. Voeg die suiker en botter by en pols dit tot dit goed gemeng is. Druk die krummelmengsel teen die boom en kante van die pan sodat dit ’n rand van 5 cm vorm. Sit dit in die vrieskas.
Pols die avokado, roomkaas, lemmetjiesap, sout en die helfte van die lemmetjieskil in ’n voedselverwerker tot dit glad is. Roer dan die koue roommengsel daarby. Skep die vulsel in die bevrore kors en sit dit vir 2 uur in die vrieskas of oornag in die yskas voordat jy dit voorsit. Versier die yskastert met die res van die lemmetjieskil. Vir afwisseling kan jy ’n laag donkersjokolade oorrasper.