Slaai met geposjeerde hoenderborsie en geklopte feta

Genoeg vir 4 Bereidingstyd 15 minute Gaarmaaktyd 30 minute

Jy benodig

VIR DIE HOENDER

• 1 blokkie goeie hoenderaftreksel, opgelos in 500 ml water

• 1 klein ui, in kwarte gesny

• 1 klein wortel, gekap

• 1 selderystokkie, gekap

• 2 lourierblare

• 10 peperkorrels

• 4 vryloophoenderborsfilette

VIR DIE GEKLOPTE FETA

• 200 g Deense feta

• 70 ml room

• 70 ml Griekse jogurt

• ½ teelepel (2,5 ml) heel komynsaad,

gerooster en fyngestamp

VIR DIE SLAAISOUS

• 2 eetlepels (30 ml) heuning

• sap van ½ suurlemoen

• 1/3 koppie (80 ml) ekstrasuiwer olyfolie

• 40 g vars koljanderblare, gekap

VIR DIE SLAAI

• 80-100 g mikroslaaiblaartjies

• 1 komkommer, in linte gesny

• 4 sprietuie, gekap

• korserige brood om voor te sit

Só maak jy

Maak die hoenderborsies Los die aftreksel op in die water (of gebruik 500 ml vloeibare aftreksel) en voeg dan die ui, wortel, seldery, lourierblare en peperkorrels by. Verhit die mengsel tot kookpunt. Skep die hoenderborsies in die aftreksel en posjeer dit vir 20 minute of tot dit gaar is. Skep dit met ’n gaatjieslepel uit en laat dit eenkant afkoel. Maak die geklopte feta Meng die feta, room en jogurt in ’n bak en klits dit tot lig en donsig. Vou die geroosterde komyn by die mengsel in. Maak die slaaisous Klits die heuning en suurlemoensap saam. Gooi dan die olyfolie in ’n dun straaltjie by terwyl jy die mengsel vinnig klits. Voeg die gekapte koljander by. Maak die slaai Verdeel die geklopte feta tussen vier opdienborde. Sny elke hoenderborsie in die lengte in dun skyfies en pak dit op die feta. Verdeel die mikroslaaiblaartjies tussen die borde en rond dit af met die komkommerlinte en sprietuie. Drup van die slaaisous oor en sit dit as ’n hoofgereg voor saam met ’n korserige broodjie.