WAAROOR GAAN DIE BANGMAAKSTORIES?

Die onlangse “skoknuus” dat verwerkte en gerookte vleisprodukte ’n mens kanker gee, het behoorlik die kat in die duiwehok losgelaat, veral onder Banting-apostels wat hulle nie ’n lewe sonder spek kan voorstel nie.

Soos talle van die kanker spesialiste rol Sean ook maar net sy oë oor die alarmistiese koerantberigte. “As dit by jou gesondheid kom, was matigheid nog altyd die wagwood. Te veel van enige ding – selfs water – is uiteindelik sleg vir jou gesondheid.”

Volgens Sean kom veral twee chemiese stowwe ter sprake in navorsing oor die karsinogeniese eienskappe van gerookte kos: polisikliese aromatiese koolwaterstowwe ( polycyclic

aromatic hydrocarbons oftewel PAH’S) en nitrosamiene.

PAH’S sluit meer as 100 organiese verbindings met twee of meer koolstofringe in, maar net ’n paar hiervan is skadelik in groot hoeveelhede. PAH’S beweeg as rook (van die vleisvet wat op die vuurwarm kole land) en kom gewoonlik voor bo 400 ºc – dit kan dus net gedurende die warmrookmetode ontstaan.

“Ons verlaag die risiko hiervoor omdat ons warmgerookte produkte nooit direk bo ’n oop vlam gehang word nie, en buitendien moet dié chemiese stof in groot hoeveelhede voorkom om die oorsaak of katalisator vir kanker te wees. Ek kan my nie voorstel dat Suid-afrikaners braai – iets wat ons so gereeld en so goed doen – heeltemal sal laat staan nie.”

Nitrosamiene is die ander potensieel skadelike stowwe wat gevorm word weens die uitwerking van nitriet op sekondêre en tersiêre amiene, byvoorbeeld deur die gebruik van natriumnitraat (’n gewilde preserveermiddel) in spek en ander verwerkte vleis. “Maar by Aphrodisiac Shack gebruik ons slegs sout, suiker en natuurlike kruie en speserye. Ons produkte hou nie naastenby so lank soos die goed wat jy in supermarkte koop nie, maar as jy dit eers proe, sal jy verstaan dat natriumnitraat glad nie nodig is nie!” sê Sean.