Rokerige makrielpatee
Genoeg vir 4
Bereidingstyd 15 minute
Gaarmaaktyd 15 minute
Brandade is ’n patee met aartappel en olyfolie as basis – dit word in die suide van Frankryk as ’n ligte ete saam met brood, kaas, kouevleis en vrugte voorgesit. Dit word gewoonlik nie gebak nie, maar nadat ek een slag die kontras tussen die krakerige bolaag en die sagte patee geëet het, gaan dit altyd oond toe.
Jy benodig
• 1-2 (300 g) groot aartappels, geskil en in stukke gesny
• 3-4 knoffelhuisies, geskil
• 250 g gerookte makriel, gevlok (resep hiernaas)
• ½ koppie (125 ml) melk
• ½ koppie (125 ml) olyfolie
• sap en gerasperde skil van 1 suurlemoen
• ’n knippie gerookte paprika
• 2 eetlepels (30 ml) gerasperde parmesaankaas
• 2 eetlepels (30 ml) vars witbroodkrummels
• 2 eetlepels (30 ml) olyfolie
Só maak jy
Verhit die oond tot 200 ºc. Kook die aartappel en knoffelhuisies tot die aartappel gaar is. Dreineer dit. Hou die knoffel eenkant en druk die aartappel fyn, en meng dan die helfte van die makriel daarby. Pols die knoffel, die res van die makriel plus die melk en olyfolie tot dit ’n gladde sous vorm. Vou die sous deur die kapokaartappel en geur dit met suurlemoensap en -skil, sout en swartpeper, en gerookte paprika. Krap die mengsel uit in ’n oondbak. Meng die kaas, krummels en olyfolie en sprinkel dit bo-oor. Bak dit vir 15 minute.