Spruite-en-neutbrood

Ons het lensies laat uitloop om in dié brood met sy sagte, sponserige tekstuur en lekker korsie te gebruik. Dit smaak vorentoe met kappertjiebotter (resep hiernaas).

Maak 1 brood Bereidingstyd 20 minute plus rystyd Baktyd 30 minute

Jy benodig

• 1¼ koppies (310 ml) louwarm water • 2 teelepels (10 ml) kitsgis • 2 eetlepels (30 ml) heuning • 2 eetlepels (30 ml) olyfolie plus ekstra • 2 koppies (500 ml) bruinbroodmeel • 1 koppie (250 ml) koekmeel • 1½ teelepel (7,5 ml) sout • 2 koppies (500 ml) boon- en saadspruite – ons het net lensies gebruik, maar jy kan ook kekerertjies en sonneblomsaad probeer • ½ koppie (125 ml) droë sade – ons het

sonneblomsaad en pampoenpitte gebruik

Só maak jy

Klits die louwarm water, gis, heuning en olyfolie goed saam. Meng die twee soorte meel in ’n mengbak, voeg die water- engismengsel by en knie dit vir 10 minute met die hand of in ’n menger met ’n deeghaak. Smeer die bol deeg met olie, bedek die bak met kleefplastiek en laat dit op ’n warm plek rys tot dubbel die volume.

Knie die deeg af en knie dan die boontjieen saadspruite en sade daarby in. Druk die deeg liggies in ’n reghoek van omtrent 20 x 30 cm en rol dit dan in die breedte op. Smeer ’n broodpan van 20 x 10 cm met olie en sit die opgerolde deeg daarin met die naatkant na onder. Bedek dit liggies en laat die deeg vir ’n uur eenkant rys.

Verhit die oond tot 200 ºc met die oondrak in die middel. Bak die brood vir 15 minute, verlaag die oondtemperatuur tot 175 ºc en bak dit vir nog 30-35 minute.