Blom-plaatkoekies
Die kombinasie van laventel, roomkaas en eetbare blomme is gewoon onweerstaanbaar!
Genoeg vir 4 Bereidingstyd 10 minute Gaarmaaktyd 10 minute
Jy benodig
• 1½ koppies (375 ml) koekmeel • 1½ teelepel (7,5 ml) bakpoeier • ½ teelepel (2,5 ml) koeksoda • 3 eetlepels (45 ml) suiker • ½ koppie (125 ml) crème
fraîche of mascarpone • 1 koppie (250 ml) melk • 2 eiers • 1 suurlemoen, skil fyngerasper
en sap uitgedruk • 1-2 eetlepels (15-30 ml) droë
laventelblommetjies • botter vir vlakbraai • 1 koppie (250 ml) eetblare blomme – viooltjies en gesiggies werk goed
Só maak jy
Meng die meel, bakpoeier, koeksoda en suiker goed saam. Meng die crème fraîche, melk en eiers in ’n aparte bak of die beker van ’n voedselverwerker en voeg die suurlemoenskil, 2 eetlepels (30 ml) van die suurlemoensap en die droë laventelblomme by. Vou dan die nat mengsel by die droë bestanddele in tot dit net-net gemeng is.
Verhit ’n kleefvrye pan en smelt 1 teelepel (15 ml) botter daarin. Drup ’n ¼ koppie (60 ml) beslag per plaatkoekie in die warm pan en braai dit tot die koekie goudbruin en gaar aan die onderkant is. Net voordat jy dit omdraai, versier die bokant met 2 of 3 eetbare blommetjies. Draai die koekies om en braai die ander kant netnet lank genoeg tot die plaatkoekie deurgaar is. Herhaal die proses met die res van die beslag en voeg nog botter by die pan soos jy aangaan.
Platteland sê
Sit die plaatkoekies voor met heuning.