Platbrood (socca)

Socca – ’n platbrood wat van kekerertjiemeel gemaak en tradisioneel in ’n vuuroond gebak word – is ’n spesialiteit van Nice in Frankryk. Sonder ’n vuuroond moet jy dit in ’n gietysterpan bak en vuurwarm eet, anders smaak dit soos pap. Ek verkies die brood aan die dikker kant (tussen ’n pannekoek en ’n plaatkoekie). Kekerertjiemeel word dikwels plaaslik onder die Spice World-handelsmerk as “Chana flour” verkoop. Dit staan gewoonlik by die ander glutenvrye meel op die gesondheidsrak óf by die afdeling met Indiese bestanddele.

Maak 1 platbrood (24 cm in deursnee) – genoeg vir 4 as voorgereg Bereidingstyd 15 minute plus 2 uur rustyd Baktyd 5 minute

Jy benodig

• 1 koppie (250 ml) kekerertjiemeel • 1 koppie (250 ml) vuurwarm water

(uit die ketel net-net voordat dit kook) • 2 knoffelhuisies, fyngedruk • ½ teelepel (2,5 ml) soutvlokkies • 3 eetlepels (45 ml) olyfolie plus ekstra • mikroslaai- of -kruieblaartjies of roket

om voor te sit

Só maak jy

Meng al die bestanddele goed saam en laat dit dan vir 2 uur teen kamertemperatuur staan.

Verhit die oond tot 230 ºc. Sit ’n 24 cm-gietysterpan in die oond sodat dit omtrent 10 cm onder die roosterelement is en skakel dan die roosterelement aan. Wag minstens 10 minute tot die pan vuurwarm is. Werk versigtig en haal die pan uit die oond. Gooi 3 eetlepels olie in die pan en giet dan die beslag in die rookwarm pan – kantel dit sodat die beslag versprei.

Sit die pan dadelik terug onder die warm roosterelement en laat dit vir 3-5 minute bak tot die bokant hier en daar swart borrels maak en die randjies bruin en bros is. As alles volgens plan verloop, sal die onderkant ’n bros lagie hê met verskillende groottes lugborrels op die oppervlak. Steek die platbrood los met ’n eierspaan (dit sal waarskynlik plek-plek vassit) en krap die stukke op ’n bord uit – werk vinnig, want dit is belangrik dat jy dit stomend warm eet! Sprinkel soutvlokkies en nog olyfolie oor, plus ’n ruim hand vol mikroslaai- of -kruieblaartjies of roket.