Nuus en dagboek Lekker drinkgoed uit Durban plus ’n hele rits Kersmarkte
Koop dié somer ’n boks pasgeplukte organiese groente as jy by Lanseria-lughawe afklim, proe wêreldklas hardehout uit Durban, of loer in by die swetterjoel Kersmarkte reg oor die land.
O, suikerriet laat my staan!
Suid-afrika – nee, die wêreld – het jenewerkoors, maar as jy die internasionaal bekroonde jenewer én die magdom ander kleinskaalse hardehout van Distillery 031 in Durban wil proe, is Uber die enigste opsie... Soos soveel ander stede word Durban ook al hoe meer dorps in ’n poging om “kleiner”, lééfbaarder, meer gemeenskapsgerig en “plat op die aarde” te wees. Handgemaakte produkte wat op klein skaal vervaardig word en ’n persoonlike storie vertel – die sjiekverpakte, hoërgraad-weergawe van dít waarvoor ’n mens op die platteland by die tuisnywerheid aanklop – is deel van die verskynsel en ook een van die redes waarom Platte-
land in elke uitgawe inloer by ’n mark soos The Morning Trade (sien bl. 138). Dis juis dié mark se aanvoerder, Anna Savage, wat ons vertel het van Distillery 031 net om die draai van die mark in die Stasiedistrik, ’n effe grinterige, kompakte nywerheidsbuurt wat tans ’n klein renaissance beleef.
Só loop ons op ’n Sondagmôre (!) vir Jordan Semple raak, mede-eienaar van Distillery 031 wat aan die stuur staan van die kroeg en restaurant waar jy distilleerderytoere-en-proeë kan doen. Hy vertel Andrew Rall, wat nog altyd ’n sagte plek vir rum gehad het, het Distillery 031 (’n verwysing na Durban se skakelkode) in 2008 begin met die idee om spiritualieë te maak wat dié stad se “outentieke Afrika-energie” (en klimaat) en eklektiese kulture weerspieël. Andrew kon ook die wynwêreld se groot gonswoord “terroir” nader hark, want rum en die Brasili-
aanse spiritus cachaça word immers van suikerriet gemaak en Kwazulu-natal is die Suid-afrikaanse provinsie wat die meeste daarvan verbou.
“Ná besoeke aan Skotland, Brittanje, Frankryk, Noorweë, Brasilië en die VSA het Andrew ’n goeie idee gehad hoe die res van die wêreld die distilleerproses benader en besluit om hom, in navolging van die boetiekbierrevolusie, volskaals in die boetiekdistilleerproses te werp wat toe nog in sy peuterskoene was,” sê Jordan.
Amper ’n dekade later is daar spiritualieë te kus en te keur: D’urban Durban Dry Gin (’n besonderse klassieke London Dry-styl jenewer wat in 2017 by die Internasionale Spiritualieëkompetisie in New York as die beste Suid-afrikaanse jenewer aangewys is), D’urban Barrel Aged Gin (dieselfde jenewer, maar in Franse eikehoutvate verouder), 031 Vodka (dit word van suikermelasse gemaak en tien keer gedistilleer), Água Zulu Cachaça (dit word volgens die tradisionele Brasiliaanse proses van suikerrietsap gemaak en in ’n koperstookketel gedistilleer), Ancestors Absinthe (die omstrede “groen feetjie” in die tradisonele Franse styl met anys en onder meer inheemse wildeals), en ’n 10 jaar oue potketelbrandewyn wat op Wellington gestook word.
Deesdae is daar ook ’n vodkabasis-aperitiefreeks (25% alkohol) in vier geure: Vanielje & Kremetart, Nartjie & Rooibos, Kaneel & Wildedagga en Heart of Darkness (’n koffiegeur-aperitief met enkeloorsprong-arabicabone uit die Merustreek in Tanzanië wat 30% alkohol bevat). Ons is verder mal oor hulle twee mengelstrope wat jy aanmaak: ’n tradisionele Victoriaanse Tonic Cordial, perfek vir daardie verfrissende G&T wat sal help om muskiete die hasepad te laat kies (dis nou tot die vlermuise intrek in die vlermuishuis op bl. 106), en limonade. Een van die dae is daar ook Bay of Plenty Spiced Rum wat tans stilletjies in eikehoutvate verouder – beslis nie die soort wat jy met Coke sal wil opfoeter nie. Ons lek solank ons lippe af.