Wits Siyakhana Initiative
Johannesburg, Gauteng
’n Stewige fondament
Siyakhana is in 2005 deur prof. Michael Rudolph begin as ’n projek van Wits om gesondheid te bevorder, voedselsekerheid te verhoog en omgewings te verbeter. Stadig maar seker is 1 ha van ’n verwaarloosde park in die ooste van Johannesburg omskep in ’n florerende vrugteengroentetuin wat voedselsekerheid verbeter, inwoners met vaardighede toerus én ’n navorsingspunt skep vir akademici uit verskillende velde én wêrelddele.
“Ons het groot sukses gehad om skenkings in die hande te kry,” sê Michael, “maar uiteindelik moet elke tuin finansieel lewensvatbaar wees omdat afhanklikheid van skenkers ongesond is. Belangriker nog sorg kleinskaalse kommersiële tuine vir volhoubaarheid en groter verantwoordelikheid.”
In ’n poging om finansieel onafhanklik te word het hulle ’n koöperatiewe maatskappy gestig wat uit sewe tuiniers bestaan. Hulle moet saam met Michael ’n inkomste genereer deur elke week vars produkte van ongeveer R4 000 te verkoop en opleidingskursusse aan te bied.
“Ons leef elke dag die konsep van Siyakhana uit – dit beteken ‘om mekaar op te bou’, verduidelik Michael – “maar elke tuin het een sterk leier nodig wat die verskillende aspekte kan bestuur.”
Tans werk hy daaraan om die kapasiteit van sy span uit te bou om seker te maak toekomstige bestuurders sal kan voortbou op die projek se stewige fondament.
“Baie gemeenskapstuine begin goed, maar kan dit nie volhou nie. ’n Mens kan nie die harde werk, kennis, kundigheid en beplanning onderskat wat dit verg nie. Maar Siyakhana is een van die opwindendste projekte waarby ek nog betrokke was. Die beloning is groot.”