Spinasie-en-jogurtdoopsous
Genoeg vir 6 Bereidingstyd 10 minute Gaarmaaktyd 5 minute
Dié ongewone doopsous is ’n Iranse gereg en word saam met pitabrood as voorgereg voorgesit. Dis ewe lekker saam met warm kos soos gebraaide lamsvleis of hoender.
JY BENODIG
• 1 pak (400 g) spinasie • 1 klein knoffelhuisie, fyngedruk • 3 eetlepels (45 ml) olyfolie • 160 ml gewone jogurt • 1 eetlepel (15 ml) gekapte vars
mentblare • 25 g pistasieneute
SÓ MAAK JY
Kry ’n groot kastrol vol water aan die kook, dompel die spinasie daarin en dreineer dit amper onmiddellik. Sodra dit effens afgekoel het, gebruik jou hande om die water uit die spinasie te druk. Kap die spinasie baie fyn.
Soteer die knoffel en spinasie vir enkele minute in ’n pan met die olyfolie tot die mengsel deurwarm is. Dreineer weer enige vloeistof, indien nodig, en laat dit afkoel.
Roer die spinasiemengsel deur die jogurt en geur dit met ment. Proe en geur dit na smaak met sout en gemaalde swartpeper. Sprinkel laastens die pistasieneute booor en sit dit dadelik voor.