IS OESTER NOU ASPOESTER?

Oesterbaai is een van vier dorpe wat bespreek is in Jac Kritzinger se bestemmingstorie onder die opskrif “Tussen die suiwel en die diepblou see” (mooi woordspeling) in die Somer 2017-’18-uitgawe van Platteland.

Dit is so jammer dat ’n joernalis met ’n paar letters op papier alles kan vernietig wat oor jare met groot moeite en koste tot stand gebring is. Ons besoek Oesterbaai al meer as 40 jaar en besit vir ’n groot deel van dié tyd ook ’n vakansiehuis daar.

In die heel eerste sin van die artikel word die negatiewe trant gevestig met die verwysing na piepklein, verlate en windverwaaid. Ek sou nie sê ’n dorp met meer as 200 wonings is “piepklein” nie en allermins verlate! Die joernalis het hom nie eens verwerdig om die amptelike verteenwoordigers van Oesterbaai se mense (permanent en nie-permanent) op te spoor en ’n mening te kry nie.

U artikel dra niks by om ons unieke paradys te bemark nie en ek vertrou dat u in die toekoms twee keer sal dink voordat sulke swak berigte die wêreld ingestuur word! Jy het te vinnig gelees, Kobus – die skrywer het met minstens ses inwoners en/of vakansiegangers op Oesterbaai gesels. Ons hou ver verby “amptelike” verteenwoordigers wat dikwels net die soort vals lofliedere sing wat jy in glansryke reistydskrifte sal aantref. “Piepklein, verlate en windverwaaid” klink dalk vir sommige mense negatief, maar ander sal wat gee om op so ’n plek te gaan woon. – Reds. >