Trappe na toentertyd
Een van die fassinerendste bouvalle wat ek nóg teëgekom het, is De Grendel, ’n lieflike ou klipbousel aan die bopunt van Deer Park in Kaapstad. Die huis, wat vinnig agteruitgegaan het en nou toegegroei is onder dik bosse en bome, is waarskynlik vroeg in die 19de eeu gebou, moontlik as ’n meulhuis (dis gebou by die kruising van twee bergstrome, waarvan een Platteklip is). De Grendel is die bron van vele legendes: Sommige beweer die ryk Van Breda-gesin se melaatse seun het hier gebly, terwyl ander beweer dit was die wegkruipplek van ’n heks. Wie ook al so gelukkig was om hier te woon, met dié stel stewige kliptrappe wat oploop na wat destyds die voorstoep was, het waarskynlik ’n manjifieke uitsig oor Tafelbaai in die verte onder gehad terwyl seilskepe spook om ’n plekkie in die hawe te kry.