‘Van watter Carstense is jy?’
Oswald Kurten se fotoessay oor die koringoes op Koringberg herinner my aan die aangename tye wat ons as “Transvalers” op my pa se familieplaas, Vleidam, deurgebring het. Gewoonlik was dit oor skoolvakansies, maar soms het ons daar aangekom as dit ploeg-, saai- of oestyd is. Ek onthou die trekkers, saaiery, snymasjiene, koringgerwe en dorsmasjiene. Die foto wat Oswald van Somersverdriet af geneem het, is ’n goeie voorbeeld van hoe die Swartland ná oestyd lyk.
Op Vleidam was daar alles waaroor ’n kind kan droom: Alle soorte diere, adamsvye en honderde kelkiewyne by die plaasdam. En moenie die koekemakrankas vergeet nie – ons het saam met die plaaskinders kilometers ver gaan soek na dié “krankies”.
Die inwoners van Koringberg en die boere van die omgewing was altyd soos een groot familie. Wanneer jy as vreemdeling daar aangekom het, moes jy stadig en in detail verduidelik “van watter Carstense” jy is. Sover ek kan onthou, het my oupagrootjie Stephanus Christiaan Carstens die plaas Vleidam in 1912 gekoop. Sy twee oudste seuns, Hendrik Andries (oompie Hennie, my oupa) en Stephanus Christiaan (oompie Fanie), het saam met hom op Vleidam begin boer.
My oupa het vyf seuns gehad: Hendrik Andries (my pa), Fanie (later die eienaar van Somersverdriet), Koos, Alwyn en Chrisjan. Op die plaas is ’n hele paar familiegrafte van mense wat hier geboer het.
Ek weet nie hoe en wanneer Vleidam van eienaars verwissel het nie, want geeneen van die ouer familielede kon antwoorde verskaf nie. Baie dankie aan John en Nikki Loxton vir wat hulle nou daar doen. Doen so voort! Chris Carstens PRETORIA-NOORD >