Outydse snyboontjieen-mosterdblatjang
Dié blatjang herinner ’n mens nogal aan die gewilde boere-groenboonpiccalilli, maar met ’n varser en suurder smaak en krakeriger tekstuur. Die geheim is om nie die bone te lank te kook nie sodat dit heldergroen en bros bly. Maak 5-6 flesse van 250 ml elk Bereidingstyd 30 minute Gaarmaaktyd 30 minute
JY BENODIG
• 750 g groenbone • 2 middelslag-uie, gekap • 150 ml moutasyn • 8 heel wonderpeperkorrels ( allspice) • 1 teelepel (5 ml) heel koljandersaad • 1 teelepel (5 ml) geel mosterdsaadjies • 1 eetlepel (15 ml) Engelse mosterdpoeier • 2 teelepels (10 ml) heelkorrelmosterd • 2 teelepels (10 ml) borrie • 200 g witsuiker • 7 ml sout • 150 ml appelasyn • 3 tamaties, gekap • 2 eetlepels (30 ml) mielieblom
SÓ MAAK JY
Sny die puntjies van die groenbone af en sny die bone dan diagonaal in 3 cmstukkies. Verhit ’n middelslag-kastrol met water tot kookpunt en kry solank ’n groot mengbak vol yswater gereed. Dompel die groenbone vir net 1 minuut in die kokende water, dreineer dit in ’n vergiettes en gooi dit onmiddellik oor in die bak yswater om die gaarmaakproses te stop en seker te maak die bone bly heldergroen en bros.
Gooi die ui, moutasyn, wonderpeper en koljander- en mosterdsaad in ’n kastrolletjie en verhit dit tot kookpunt. Verlaag die hitte en laat dit vir 10 minute liggies prut.
Meng die mosterdpoeier, heelkorrelmosterd, borrie, suiker, sout en appelasyn in ’n bakkie. Voeg die tamaties by die kastrol met uie, voeg die mosterdmengsel by en laastens die groenbone. Laat dit vir 15 minute prut, maar sorg dat die bone groen en bros bly.
Meng die mielieblom met 2 eetlepels (30 ml) water en roer dit deeglik deur die mengsel. Laat dit vir nog 3 minute prut tot die mielieblom gaar is en die mengsel verdik het. Verdeel die mengsel tussen die warm gesteriliseerde flesse en verseël dit dadelik. >