Paneer-en-groenboontjiekerrie
Paneer – ’n sagte kaas wat in Indiese geregte gebruik word – is deesdae in supermarkte te koop, maar dit is ook redelik maklik om self te maak. (In Platteland #4, die Lente 2014-uitgawe, het ons ’n resep gedeel.) Jy kan dit met blokkies romerige fetakaas vervang óf selfs weglaat. ( Die lewe is darem net te kort om énige kaas weg te laat. – Reds.) Genoeg vir 4 Bereidingstyd 10 minute Gaarmaaktyd 20 minute
JY BENODIG
• 750 g groenbone • 1 stuk vars gemmer van 4 cm, geskil • 10 knoffelhuisies, geskil • ½ koppie (125 ml) water • 3 eetlepels (45 ml) olyfolie • 2 teelepels (10 ml) fyn komyn • 1 droë brandrissie, fyngekap • 2 teelepels (10 ml) fyn koljander • ½ teelepel (2,5 ml) rooipeper • 2 eetlepels (30 ml) tamatiepasta • 2 tamaties, fyngekap • 200 g paneer • fyngerasperde skil en sap van 1 suurlemoen • ¼ koppie (60 ml) fyngekapte vars
koljanderblare om voor te sit • 4 roti’s om voor te sit
SÓ MAAK JY
Sny die puntjies van die groenbone af en sny dit dan in stukkies van 1-2 cm. Gooi die gemmer, knoffel en water in ’n voedselverwerker en pols dit tot ’n gladde smeer.
Verhit die olie in ’n groot swaarboomkastrol oor matige hitte en braai die speserye tot dit geurig is – roer dit die heeltyd en pasop dat dit aanbrand. Voeg die gemmer-en-knoffelmengsel en tamatiepasta by en kook dit vir 1 minuut terwyl jy dit dit heeltyd roer.
Roer die vars tamatie by en laat dit vir 10 minute prut. Roer nou die groenbone by en laat dit vir nog 5 minute prut tot die tamatie sag en die bone net-net gaar is. Roer laastens die paneer en suurlemoenskil en -sap by en geur die kerrie na smaak met sout en varsgemaalde swartpeper.
Sit die kerrie voor met fyngekapte vars koljanderblare en roti’s.