Mediterreense groenboontjiepasta

Hierdie veelsydige pastagereg is propvol gesonde bestanddele. Jy kan ook die witsous met ’n vinaigrette vervang en ’n smaaklike pastaslaai maak.

Genoeg vir 6 Bereidingstyd 10 minute Gaarmaaktyd 15 minute

JY BENODIG

• 350 g volkoringmacaroni • 400 g dun Franse groenbone • 2 eetlepels (30 ml) botter • 3 eetlepels (45 ml) volkoringmeel • 2 koppies (500 ml) melk, liggies verhit • 1 teelepel (5 ml) neutmuskaat • 140 g beleë cheddarkaas, gerasper • 100 g okkerneute, liggies gerooster • 200 g kersietamaties • 100 g ontpitte swart olywe

SÓ MAAK JY

Kook die macaroni volgens die aanwysings op die pakkie. Sny die groenbone in 3 cm-stukke en dompel dit vir 2 minute in kokende water. Dreineer dit dadelik en hou dit eenkant.

Maak ’n witsous deur die botter in ’n middelslag-kastrol oor matige hitte te verhit. Roer die meel by tot dit ’n gladde smeer vorm en begin dan die melk bietjies-bietjies byvoeg – klits dit die heeltyd met ’n ballonklitser om te keer dat die mengsel klonte vorm. Roer dit vir 4-5 minute aanhoudend tot die witsous dik is en groot borrels vorm.

Voeg die neutmuskaat by en geur die sous met sout en varsgemaalde swartpeper na smaak. Roer die witsous deur die gaar macaroni. Voeg die groenbone en die helfte van die kaas by. Garneer die pasta met die okkerneute, kersietamaties, olywe en die res van die kaas.