Pasteie met groenbone en soetrissie

Hierdie pasteie het my stoutste verwagtinge oortref – wie sou kon dink soetrissie, feta en groenbone kan so ’n lekker kombinasie wees vir ’n vulsel!

Genoeg vir 8 Bereidingstyd 30 minute Gaarmaaktyd 30-40 minute

JY BENODIG

• 300 g groenbone • 2-3 rooi of geel soetrissies • 6 sprietuie, in dun ringetjies gesny • 2 eiers, geklits • 200 g fetakaas, gekrummel • 100 g beleë cheddarkaas, gerasper • ½ teelepel (2,5 ml) droë rissievlokkies • gerasperde skil van 1 suurlemoen • 8 velle filodeeg • 100 ml gesmelte botter

SÓ MAAK JY

Sny die groenbone in 3 cm-stukke en dompel dit vir 2 minute in kokende water. Dreineer dit dadelik en hou dit eenkant.

Verhit die oond tot 200 ºc en voer ’n bakplaat met bakpapier uit. Pak die soetrissies daarop en rooster dit vir 20 minute of tot dit sag is. Sny dit in dun repies.

Meng die groenbone, soetrissie, sprietui en eier. Vou die feta- en cheddarkaas daarby in. Geur die vulselmengsel met die rissie, suurlemoenskil, en sout en varsgemaalde swartpeper na smaak.

Verf een vel filodeeg met gesmelte botter en vou dit middeldeur sodat dit in ’n reghoek voor jou lê. Verf die kante met gesmelte botter, skep ’n agste van die vulsel op die deeg en vou dan die “lang” kante in om seker te maak die vulsel loop nie by die kante uit nie. Verf weer die kante met botter en rol dan die deeg in die lengte op met die vulsel binne-in. Tel die pastei versigtig op die voorbereide bakplaat en herhaal die proses met die res van die bestanddele om altesame 8 pasteie te maak.

Verf die bokant van elke pastei met gesmelte botter en bak dit vir 10 minute of tot dit mooi goudbruin is. >