Soutige kekerertjieplaatkoekies met groenbone
Kekerertjiemeel word dikwels onder die naam “chana flour” verkoop. Dit is ’n baie smaaklike, gesonde en boonop glutenvrye manier om ’n ete met plantproteïen te verryk.
Genoeg vir 2 Bereidingstyd 10 minute Gaarmaaktyd 10 minute
JY BENODIG
• 1 koppie (250 ml) kekerertjiemeel • 2 eetlepels (30 ml) vlassaadmeel
( flax seed flour, opsioneel) • 2 teelepels (10 ml) bakpoeier • 1 teelepel (5 ml) sout • 1 teelepel (5 ml) borrie • 3 klein sprietuie, diagonaal in
skyfies gesny • 2 klein knoffelhuisies, fyngedruk • 2 teelepels (10 ml) uiesaad • 2 teelepels (10 ml) heel mosterdsaad • 3 eetlepels (45 ml) olie vir braai • 150 g Franse groenboontjies, in dun
repies gesny
OM VOOR TE SIT • skyfies of wiggies vars lemmetjie • jogurt of roomkaas gegeur met knoffel • Indiese piekels en atjars
SÓ MAAK JY
Meng die kekerertjie- en vlassaadmeel, bakpoeier, sout en borrie in ’n bak en voeg genoeg water by tot die mengsel soos plaatkoekiebeslag lyk. Roer dan die sprietuie, knoffel en uie- en mosterdsaad by.
Verhit die olie in ’n pan of braaipan en skep lepels vol deeg in die pan. Sprinkel die groenbone oor die rou beslag in die pan. Draai ná 3 minute die plaatkoekies om en braai die ander kant ook vir 2-3 minute tot dit deurgaar is.
Sit die plaatkoekies dadelik voor met lemmetjieskyfies, roomkaas of jogurt en Indiese piekels en atjars.