Halloumi-panzanella
Panzanella is ’n Italiaanse slaai wat grootliks uit brood en tamatie bestaan. Hierdie weergawe kan jy voor die tyd maak, maar dit is beter om die halloumi te braai net voordat jy dit gaan voorsit.
Genoeg vir 6 Bereidingstyd 10 minute Gaarmaaktyd 20 minute
JY BENODIG
• 1 rooiui • 1 koppie (250 ml) witasyn • 3 eetlepels (45 ml) suiker • 2 teelepels (10 ml) heel komynsaad • 2 teelepels (10 ml) heel koljandersaad • 1 teelepel (5 ml) droë rissievlokkies • ¼ koppie (60 ml) olyfolie plus ekstra
om te braai • 5 snye suurdeegbrood • 500 g halloumikaas • 600 g kersietamaties in verskillende
kleure, middeldeur gesny • 1 komkommer, in die lengte middeldeur
en in skyfies gesny • 20 g vars mentblare • gerasperde skil en sap van 1 suurlemoen
SÓ MAAK JY
Sny die ui in dun ringe. Verhit die asyn en los die suiker daarin op. Gooi die warm asyn oor die ui en laat dit eenkant staan.
Rooster die speserye vir ’n paar minute in ’n droë pan tot geurig. Gooi die olyfolie in die warm pan, haal dit dadelik van die plaat af en hou dit eenkant.
Rooster die brood tot bros. Sny die halloumi in die breedte in repe van ongeveer 5 mm dik. Verhit ’n skeut olie in ’n kleefwerende pan en braai die halloumirepe daarin tot mooi goudbruin en bros.
Rangskik die tamatie, komkommer en mentblare op ’n opdienbord. Dreineer die ui en rangskik dit bo-op die tamaties. Breek die geroosterde brood in stukkies en rangskik dit bo-op die slaai.
Voeg die suurlemoensap en -skil by die pan met die speserye en olyfolie, en drup dit dan oor die slaai.
Rangskik laastens die warm halloumivingers op die slaai en sit dit dadelik voor.