Bloubessie-kaaskoek skywe
Hierdie bloubessie-en-suurlemoenkaaskoek is soos ’n skyfie somer op ’n bordjie. Genoeg vir 6 Bereidingstyd 15 minute plus yskastyd Baktyd 35 minute
JY BENODIG
• 250 g spysverteringskoekies
( digestive biscuits), fyngekrummel • ½ koppie (125 ml) botter, gesmelt • 230 g volvetroomkaas teen
kamertemperatuur • 2 groot eiers • ¼ koppie (60 ml) suiker • ¼ koppie (60 ml) heuning • 2 teelepels (10 ml) vanielje-ekstrak • gerasperde skil en sap van 1 suurlemoen • ½ koppie (125 ml) bloubessiekonfyt • ½ koppie (125 ml) bloubessies
(vars óf bevrore)
SÓ MAAK JY
Verhit die oond tot 180 ºc. Voer ’n koekpan van 22 x 20 cm uit met bakpapier en spuit dit met kleefwerende kossproei. Meng die koekiekrummels met die gesmelte botter en druk dit stewig vas in die uitgevoerde koekpan. Sit dit vir 20 minute in die yskas.
Klits die roomkaas, eiers, suiker, heuning en vanielje saam in ’n mengbak. Voeg die suurlemoensap en -skil laaste by – só keer jy dat die mengsel skif.
Haal die koekpan met die kors uit die yskas. Giet die helfte van die roomkaasmengsel oor die kors. Voeg die bloubessiekonfyt by die orige roomkaasmengsel en meng dit goed deur. Giet dit dan versigtig bo-oor die roomkaas wat reeds in die koekpan is. Gebruik ’n stokkie om versigtig in die lengte 4 strepe in die roomkaasvulsel te trek – sorg dat jy die stokkie net in die roomkaas trek en nie ook in die koekiekrummels nie! Sprinkel laastens die bloubessies eweredig oor die roomkaas.
Bak die koek vir 30-35 minute tot die mengsel net-net gestol het – dit sal in die middel nog effens beweeg as jy liggies aan die pannetjie raak.
Haal die pan uit die oond en sit dit op ’n afkoelrakkie. Sodra dit heeltemal afgekoel het, sit die kaaskoek vir minstens 4 uur in die yskas voordat jy dit in skywe sny en voorsit. Vir ekstra mooi (en lekker!) kan jy versuikerde suurlemoenskyfies daarmee saam bedien – sien die resep hiernaas.