Magiese Botswana

Is jy lugtig om Afrika op jou eie aan te durf? Kom saam met Weg en Bhejane 4x4 Adventures op ’n onvergeetlike Trans-botswana-toer. Jou tent word vir jou op- en afgeslaan, en ’n span bossjefs maak elke dag drie heerlike etes.

Die toer word gelei deur ’n ervare natuurbewaarder en avontuurgids wat deurentyd in radioverbinding is.

DAG 1 Ons kry mekaar in Letlhakane en maak die brandstoftenks vol voordat ons na die Makgadikgadipanne koers kies. Ons oornag op Kubu.

DAG 2 Ywerige fotograwe sal die sonsopkoms oor die pan geniet met koffie en beskuit in die hand. Ná ontbyt en ’n stappie op die eiland met sy interessante rotsformasies en ikoniese kremetartbome is dit tyd om noord te mik na ons oornagplek – ’n kampterrein buite Maun.

DAG 3 Ons bring die oggend in Maun deur vir inkopies en brandstof. Daar is ’n geleentheid vir ’n vlug oor die Okavangodelta. ( Vir jou eie rekening.) Dan vat ons weer die pad, na ons volgende oornagstop op die oewer van een van die delta se hoofkanale. Die logistieke span slaan kamp op en die potte is reeds aan die prut wanneer ons daar aankom.

DAG 4 Ná ’n paar dae se ryery is dit tyd om te ontspan. Die kamp is bekend vir sy voëls, waaronder die inwonende visuil. Laatmiddag verken ons die waterweë van die Okavangodelta en pypsteel op ’n vaart in gemaklike aluminiumbote.

DAG 5 Ons ry noord tot in Namibië oor die Tsodiloheuwels met sy manjifieke rotskuns. Hier besoek ons die museum en geniet ’n piekniekete. Ons kampplek vir die volgende drie aande is ’n skaduryke kol aan die Okavangorivier.

DAG 6 Ons eet ’n laatontbyt en dan kan jy die wêreld op jou eie verken. Doen ’n wildrit in die Bwabwatanasionale park, kyk voëls, doen ’n mokorovaart of ’n toer van die dorpie, óf vang vis. Ons kry mekaar weer laatmiddag vir ’n skemervaart op die Okavangorivier. (Ingesluit by die toerprys.)

DAG 7 Ons besoek die Mahangowildreservaat, waar jy vier van die Groot Vyf kan sien, asook groot troppe bastergemsbokke en swartwitpense. Voëlkykers kan daarna uitsien om van die meer as 300 voëlspesies in die park te siene te kry.

DAG 8 Ons pak op en ry terug Botswana toe oor die Zambesistreek. Ons volgende kampplek is net buite Kasane, waar ons die laaste drie aande deurbring.

DAG 9 Vandag gaan ons op ’n bustoer na die Victoriawaterval waar ons piekniek hou vir middagete, en in die dorpie Victoria Falls inkopies doen. Hier is verskeie avontuuraktiwiteite beskikbaar, soos rekspring, roei op die rivier en helikoptervlugte. (Nie ingesluit by die toerprys nie.).

DAG 10 Ons doen ’n rit deur die Chobenasionale park in ’n oop wildkykvoertuig en geniet die middag ’n drie uur lange bootvaart op die Choberivier. Ons bring ons laaste aand om die kampvuur deur en vier die nuwe vriendskappe wat hier gesmee is terwyl ons die wonder van die SuiderAfrikaanse wildernis saam beleef het.

DAG 11 Dis tyd om te groet...