Lulu se top 6-kragplante

1 CENTELLA ASIATICA staan in die volksmond bekend as naelkruid, waternael en varkoortjies, maar word elders ter wêreld meestal gotu kola genoem. Dit laat die vel jonger en fermer lyk omdat dit kollageenproduksie, mikro sirkulasie en herstel aanmoedig. Navorsing toon dit kan ook help vir selluliet.

2 SYMPHYTUM OFFICINALE is bekend as smeerwortel en word as ’n wonderkrui beskou wat wonde, velirritasies en selfs beenbreuke vinniger help genees. Omdat dit die vel help om vog te bewaar en die vormingsproses van velselle balanseer en normaliseer, word dit veral vir chroniese toestande soos psoriase gebruik.

3 ERIOCEPHALUS AFRICANUS, beter bekend as wilderoosmaryn of kapokbossie, het kragtige anti-inflammatoriese eienskappe wat velkwale streel. Terselfdertyd, skryf wyle Margaret Roberts, het dié inheemse plant net soos gewone roosmaryn ook ’n verfrissende uitwerking op die vel en hare.

4 CINNAMOMUM CAMPHORA, oftewel kanferboom, verlig pyn, swelling en veluitslae. Danksy die anti-inflammatoriese eienskappe word dit veral gebruik om ekseem te verlig.

5 TROPAEOLUM MAJUS – die getroue ou kappertjie – bevat baie vitamien C, wat selgroei stimuleer en help om beskadigde vel vinniger te herstel. Dit reinig en suiwer die vel en laat dit beter vertoon.

HELICHRYSUM RUDERALE, ’n aromatiese onkruid (“ruderale” beteken “groei tussen vullis”!) wat in KwazuluNatal voorkom, word ook geelsewejaartjie genoem, maar sy ander naam – Immortelle – verklap waarom dit in velsorgprodukte gebruik word. Die plant bevat ’n magdom antioksidante wat velvernuwing en -herstel aanmoedig.