MAAK ’N KERSGESKENK UIT JOU KRUIETUIN
Min dinge is so lekker as om vriende met iets uit jou tuin te bederf. In die somermaande is basilie behoorlik uitbundig, en daarom wys ons jou hoe om binne ’n halfuur met al daai ekstra blare ’n veelsydige basilieolie te maak.
JY BENODIG
• ’n glasbottel met ’n kurkprop (ons het
’n leë jenewerbottel gebruik) • 2 koppies gekneusde basilieblare • 1 koppie olyfolie • growwesout • 1 knoffelhuisie
SÓ MAAK JY
1Steriliseer die glasbottel en prop deur dit met skottelgoedseep te was en dit dan in kookwater te laat lê. Laat dit behoorlik droog word in die son. 2Pluk genoeg basilieblare om twee koppies vol te maak (styf ingedruk). Breek die stingeltjies teen die blare af en maak seker daar sit geen spinnerakkies of goggatjies aan die onderkant vas nie. Sit die blare in ’n vergiettes onder lopende water en spoel dit goed af. 3Blansjeer die basilieblare vir een minuut in kookwater. Haal dit uit die water en druk dit goed droog. 4Gooi een koppie blare in die bak van ’n voedselverwerker en gooi die hele koppie olyfolie daarby. Pols die blare fyn. Voeg twee draaie growwesout by die mengsel en voeg die knoffelhuisie en die res van die blare by. Pols die mengsel weer – jy kan self besluit hoe fyn of grof jy die blare wil kap. 5Gooi die mengsel deur ’n tregter in die glasbottel. Versier dit met ’n plakker en ’n stukkie tou om die nek.
wenk
Dié basilieolie is heerlik op ’n geroosterde broodjie saam met vars tamatie, maar ook oor ’n geposjeerde eier, ’n kraakvars slaai, vis of pasta. Dit sal vir ongeveer ’n week in die yskas hou – gebruik dit dus sommer elke dag.