Kom snuffel in die Insta-woud
Op Instagram laat the_mushroom_forager sy byna 5 500 volgelinge droom – oor feëverhale, sampioengeregte en verkenningstogte. Maja Palm gesels met Justin Williams, die man agter dié blad.
Hoekom het jy dié blad begin? Ek is naweke meestal in die woud op soek na sampioene, en stap dan gereeld met ’n mandjie vol by ’n vriend se kombuis in waar ons sommer iets interessants daarmee kook. Op my Instagramblad deel ek dié stokperdjies: my avonture op soek na wilde sampioene, kosmaak met bestanddele wat ek in die natuur “oes”, en die genesende krag van plante. In die week werk ek in die opwindende wêreld van kripto-geldeenhede en naweke leef ek my lewenslange liefde vir die natuur uit.
Waar kom jou belangstelling in sam
pioene vandaan? My pa het ons gesin in die winter van 1997, toe ek tien jaar oud was, na die Tokaiwoud in die suidelike voorstede van Kaapstad geneem om sampioene te pluk. Ek het niks van dié fungi geweet nie, maar het vroeër die week ’n boek daaroor uitgeneem. Tot ons groot teleurstelling was nie een van die sampioene waarop ons afgekom het, eetbaar nie. Maar my nuuskierigheid was geprikkel.
Watter eienskap van sampioene is vir
jou fassinerend? Die grootste deel van die fungi-organisme bestaan uit miselium, ’n netwerk van klein draadjies wat inligting oordra, amper soos die internet – ek noem dit die “woud-wye web”. Miselium leef ondergronds of in bome en stompe, en die sampioene wat jy sien kop uitsteek, is in der waarheid die vrug van dié organisme. Waarom maak sampioensoek – beter bekend as foraging – jou opgewonde? Dit is vir my ongelooflik om weer af te kom op ’n sampioenspesie wat ek die vorige seisoen laas gesien het. Sampioene kom jaar ná jaar op dieselfde plek op en dit voel amper of jy ’n ou vriend raakloop! ’n Groot komponent van sampioensoek is om te weet wat dit is wat hulle laat groei en floreer. As jy eers geleer het om die tekens en patrone in die natuur te lees, sal jy hulle altyd weer kan opspoor as die tyd reg is.
Het jou liefde vir sampioensoek jou geïnspireer om te begin kook, of
andersom? Op hoërskool was ek een van ’n handjie vol seuns wat huishoudkunde as ’n vak geneem het. Ek wou egter nooit ’n sjef word nie, maar dis opwindend en baie bevredigend om geregte te maak met plante wat ek in die natuur bymekaarmaak.
Het jy ’n gunstelingsampioen? Die morel! Hulle is baie skaars en groei slegs vir ’n baie kort tydjie, mits toestande nét reg is. En hulle smaak is uitsonderlik. Justin bied in 2019 praatjies aan in onder meer Hogsback en Johannesburg. Hou sy Instagramblad dop vir spesifieke datums.