SA padda bekoor Japannese

Hier by Platteland verkneukel ons ons elke uitgawe aan die prent waarmee Diek Grobler vorendag kom vir ons agterste rubriek, “So is die lewe” (bl. 144). Hy behartig al sedert die eerste uitgawe dié illustrasie en laat ’n mens altyd nadink – en meestal glimlag. Maar Diek is ook ’n skilder, beeldhouer én bekroonde animasiekunstenaar. Hy en Charles Badenhorst het in 2005 die maatskappy Fopspeen Moving Pictures begin, en saam het hulle uit ’n buitekamer in Pretoria al vier animasieprente gemaak wat wêreldwyd opslae maak. Hulle jongste prent, Net een slukkie, Padda!, ’n verhaal oor waterbesparing waarin die illustrasies van Diek se broer Piet Grobler op die skerm lewe kry, het by die onlangse Internasionale Animasiefees in Hiroshima, Japan, weggestap met ’n spesiale prys – ’n sonderlinge prestasie as ’n mens in ag neem dit is die belangrikste animasiefees in die Ooste wat vanjaar nie minder nie as 2 800 inskrywings van reg oor die wêreld gelok het. Danksy die prys het Fopspeen nou ’n internasionale verspreider vir die fliek gekry, maar jy kan die DVD direk by Diek bestel met die Afrikaanse én Engelse weergawe van Net een slukkie, Padda! daarop plus Het vogeltjes ABC, een van Fopspeen se vorige animasieflieks, as toegif. Wat ’n lekker Kersgeskenk – vir jonk én oud! Prys R120 (posgeld ingesluit) Kontak diek@fopspeen.co.za