Net buite Pretoria wag pret en plesier op mens én dier – welkom by die Cowhouse-mark in Hazeldean!
By die Cowhouse-mark, wat iedere naweek in ’n ou oop melkstal op die Hazeldean-plaas aan die oostelike buitewyke van Pretoria gehou word, sit kuier wrintigwaar vir koop ore aan.
Die meeste gesinne wat dag in en dag uit hulle lewe in die betonoerwoud of voorstede of spitstydverkeer slyt, pak naweke die koei by die horings en doen moeite om hulle chroniese kajuitkoors te verlig.
As die beursie te plat is vir ’n wegbreeknaweek ver weg van die beskawing, gaan hulle gewoonlik aan ’t fietsry of fliek, draf of drink, koop of kuier. En indien hulle slim is, in en om die Jakarandastad woon en etlike vlieë met een klap wil moker, mik hulle reguit na die Hazeldean-plaas digby Silver Lakes waar jy by die Cowhouse-mark omtrent al hierdie salige dinge kan doen. Boonop is mens en kind en hond en fiets ewe welkom hier – en as jy nie ’n fiets het nie, kan jy een huur om die roetes in die omgewing te geniet.
Dalk het Platteland op ’n stil Sondag daar uitgeslaan, maar selfs nadat die kerke uitgekom en dinge beslis besiger geraak het, het dit nooit te beknop of benoud of woelig gevoel nie. Ál drentelend tussendeur die stalletjies, wat ’n groot verskeidenheid kos, lekkernye en drank, ’n bietjie handwerk, antiekware, boeke en tweedehandse goed verkoop, kon jy sien die meeste mense kom hierheen om te ontspan en te kuier, lekker te eet en die musiekmakers te geniet, terwyl die jong klomp hulle uitwoed op die springkasteel, klimraam of ponieritte.
Ja, môre is dit Maandag, maar by dié mark sal jy dit nooit sê nie.
• Die Cowhouse-mark word Saterdae en Sondae van 09:00 tot 16:00 gehou op die Hazeldean-plaas, wat geleë is op die hoek van Ridgeweg en Oukraalboulevard. Op die laaste Saterdag van die maand hou die nagmark aan tot 22:00. Aanwysings is op die webwerf en Facebookblad.
cowhouse.co.za Cowhouse Market info@cowhouse.co.za 067 186 8767
By die tafels buite, met die verhoog aan die een kant en die speelplek vir die kinders aan die ander, word daar elke Saterdag en Sondag ’n hond uit ’n bos gekuier.
Laura Memory van Centurion en Wessel Gildenhuys van Pretoria was aan diens by die stalletjie van Hazeldean Brewing Company. Dié boetiekbier word gebrou op dieselfde plaas waar die mark gehou word, en hulle vlagskip, die Vienna Lager, en Premium Pale Pilsner is steeds die topverkopers. hazeldeanbrewing.co.za
Die sanger en kitaarspeler en -onderwyser Peter Toussaint (regs), wat as sessiemusikant by verskeie groepe betrokke is, het gesorg vir die musiek op die dag wat Platteland by die mark ’n draai gemaak het. Die baskitaarspeler saam met hom op die verhoog is Franco Jamneck.
073 307 5683 ptoussa@gmail.com
Zelmarie Hattingh was aan die stuur van sake by Assie se pannekoekstalletjie, wat ook boereworsrolle, hotdogs en corndogs (’n Weense worsie in ’n diepgebraaide degie) verkoop. Dis presies waarvoor die jong vleisetertjie Megan Jansen (9) van Waverley lus was tydens haar eerste besoek aan die mark. 082 453 0096 >
Dit lyk dalk bra stil by die Wyntreinstasie, maar hier het Nelson Santos (links) van Boksburg liters rooiwyn-, witwyn- en lietsjiegeur witwyn-“slush puppies” met sowat 5% alkohol verkoop. Ons het vir Karel Gerber (links onder op die oorkantste blad) ’n paar keer hier raakgeloop! Regs is Dawid van Dyk van Delmas. Die stalletjie behoort aan C.J. Leach, Dawid se skoonseun. 071 481 0263
BO Miki Stewart van Hazeldean het Craft Kitchen twee jaar gelede begin deur die “markwaters” te toets met sjiek toebroodjies. Deesdae pryk Mexikaanse lekkernye – van nachos tot jalapeño poppers en quesadillas – op haar spyskaart. Miki se kosprodukte word in papier of herwonne materiaal verpak – polistireen is verbode! 061 125 8997
Aangesien die Naughty Coconut (Malibu-likeur, klappersap en -vlees en grenadellapulp) die topverkoper is by Caribbean Cocktails se stalletjie, moes Vincent Siziba en Sam Phiri (regs), oorspronklik van Mosambiek en deesdae van Eastgate, met ’n intimiderende lang mes kokosneute kap dat die byle huil. “Don’t worry – look, we still have all our fingers!” sê Vincent. siziba.vincent@yahoo.com
BO André Marx van die Wilgers het 40 jaar gelede oudhede begin koop en in pakkamers opgegaar. Sedert sy aftrede in 2015 kom hy elke naweek mark toe om van die stukke te verkoop. Sy kop staan Amerika toe waar sy kinders woon, en danksy die flink markverkope het hy sedert sy aftrede nog nie ’n sent van sy pensioengeld gebruik nie.
Davin Warwick, voorheen van Hermanus en Mosselbaai, het 12 jaar gelede “die geld noorde toe gevolg” en verkoop deesdae oor naweke saam met sy dogter Jami biltong wat hy self maak onder die naam Die Plaaskardoes. “Dis die beste biltong op die mark. Kom kyk maar later vandag – hier gaan nie ’n enkele stukkie oor wees nie.” En so was dit ook! 082 239 0553
’n Vriendin van Buenos Aires het die sjef Francois Delport herinner dat die Argentyne net so lief is vir hulle asado (braai) as Suid-afrikaners, hoewel dit totaal anders gegeur word. Toe stig hy The Belly King in 2019 en begin tortillas met kruisskyf of varklies verkoop... de laaste kriesel was uitverkoop! 079 715 4622 info@gourmetchef.co.za
BO Karel Gerber verwys laggend na homself as ’n ”maplotter van Donkerhoek” wat reeds twee van sy erwe vir laekostebehuising aan die regering verkoop het. As hy die laaste erf ook verkoop (die een waarop hy tans woon), “vat ons die pad”: óf na hulle seun in Mosambiek óf Karel se suster in Spanje óf ’n lekker plattelandse dorp. Karel het die afgelope drie jaar ’n stalletjie reg by die ingang van die mark waar hy antieke en gerestoureerde meubels verkwansel asook tafels wat hy self maak. Hy noem sy onderneming Karel’s Goods. Met Platteland se besoek was hy veral opgewonde oor die mooi houtbank op die voorgrond wat deur Herbert Baker ontwerp is. Karel’s GOODS 072 651 3554
Die bees-, hoender- en spinasie-en-fetakrokette wat Karin Meyerowitz van Potchefstroom self maak en sedert die eerste mark vuurwarm of bevrore hier verkoop, is so goed soos enigiets wat jy in Nederland sal raakloop. Sy is een van ses kinders, en sy en haar broer en swaer gebruik haar pa, ’n bakker, se geheime resep. 073 364 6420 karinmeyerowitz@gmail.com
BO Muzi Mabuza (links) van Sunnyside het sy eie maatskappy, Muzi 1 Café Events, wat baristadienste by sosiale geleenthede lewer. Hy en Given Mahlangu (regs) van Mamelodi was aan diens by die koffiestalletjie van Bourbon Bean – en hulle weet hoe om ’n goeie gifsterk cappuccino te maak! muzi1cafe.co.za >
Wat is ’n mark sonder ’n stewige voorraad vars vrugte en groente? Pieter Snyders van Mooiplaats, sowat 5 km verderaan, kweek self die spinasie, tamaties en murgpampoentjies wat hy verkoop. Die ander groente by sy stalletjie koop hy aan by boere in die omgewing en soms moet hy ook by die groot varsproduktemark ’n draai maak om sy voorrade aan te vul. 071 224 1825
Ryan Mccreanot (links) van Brits en sy ouers maak gereeld ’n draai by die mark, maar het dié keer sy maatjie Ivan van der Westhuizen van Pretoria saamgesleep. Die twee was erg in hulle noppies met hulle aankope by die stalletjie van Candyland (foto regs) .
Chony Boswell van Lyttelton hou van jag en hengel en is sedert die eerste Cowhouse-mark aan die stuur van sake by African Survival se stalletjie, waar sy ingevoerde messe en handgemaakte messe van Paul Smyth verkoop. africansurvival.co.za
African Survival with Chony’s this and that corner
Juan Rossouw (16) van East Lynne het uitgehelp by sy tannie Janine van Wyk se Candyland-stalletjie, waar sy niggie Zandré Hattingh (13, links) ook gereeld gesig kom wys en grappies gemaak het. Op Candyland se spyskaart was draairoomys, melkskommels met geure te kus en te keur (die Bar One-geur kom reguit uit die duiwel se kombuis) en allerlei lekkergoed, kompleet soos die pick ’n mixtoonbanke van ouds. 060 561 1667
Dis die eerste keer in meer as ses jaar dat
Platteland ’n pool-tafel by ’n mark raakloop, en ons moet erken dis ook die heel eerste keer dat ons hoor Tyger Valley is nie net ’n inkopiesentrum in die noordelike stadsgebiede van Kaapstad nie, maar ook ’n buurt in Pretoria. Dis waar die elektrisiën Steve Kruger op die foto bo woon. Steve sê hy kom élke Sondag mark toe – eers om die fietsspeke te laat sing en dan tree hy aan vir sy weeklikse dosis potspel.
Jan Boneschans van Bronkhorstbaai verkoop ribbetjies en ribbetjieburgers, hoendervlerkies, benedict-eiers, wafels en S’mores. By hom is Adrian Hattingh van East Lynne.
Andre Bouwer van Centurion was 23 jaar in die Spesmagte en 15 jaar in die Vloot, maar maak die afgelope 39 jaar al leerprodukte onder die naam Helie-andre Leather Products. Sedert sy aftrede drie jaar gelede hou dié stokperdjie hom voltyds besig – dié sien jy sommer ’n myl ver aan die magdom produkte wat by sy stalletjie te koop is: beursies, hand-, dra-, wyn- en snoekerstoksakke,
drupmatjies, belts, messkedes, selfverdedigingspenne vir volwassenes en kinders, pypstaanders, kitaarbande, skaakstelle, vlieëplakke...
082 052 9582
Brandbekke durf nie die verskillende sterktes brandrissiesouse misloop wat die oudvlugkelner Lilo Weideman van Faerie Glen by sy huis kook nie. Sy topverkoper bly egter die bros grondboontjielekkers wat hy in grootmaat aankoop en verpak. By sy stalletjie is ook heerlike olywe uit Hartswater in die Noord-kaap, en heuning en heuningfudge wat deur Henri van Vuuren in Nelspruit gemaak word.