Eettyd sonder wreedheid
Nicky was 55 toe sy haar leefstyl verander en veganisties geword het. Sy het baie begrip vir hoe moeilik dit is om daardie besluit te maak, maar meen daar is deesdae veel meer mense wat dié leefstyl volg.
By die toevlugsoord maak Nicky en haar span beurte om aandete te kook, en alle etes wat op die plaas geëet word, is 100% vry van diereprodukte. Hierdie verbintenis tot ’n veganleefstyl het intussen uitgebrei na ’n onderneming op Greyton: Pure Café in Eenheid 3 by Hoofweg 41 is ’n eetplek waar slegs plantaardige maaltye voorgesit word, en al die wins is ten bate van Nicky se skuilplek.
Sy het Pure Café oopgemaak om ’n plek te skep waar diereliefhebbers kan eet sonder dat borde spek en eiers verby hulle gedra word. Die kos by Pure Café is uiters smaaklik en baie billik. Daar is ook deli- en ’n verskeidenheid veganistiese produkte te koop.