Wat het jy nodig?
SKOON TOERUSTING
Sorg dat absoluut alles wat jy gebruik – ja, selfs die vars produkte en veral jou hande! – skoon is sodat die goeie, voordelige bakterieë kan floreer en nie met ongewenste bakterieë moet meeding nie (oppas ook vir seperigheid wat nie behoorlik uitgespoel is nie). Was groente altyd in ’n flou soutwateroplossing af en moet ook nie met jou hande aan die pekeloplossing raak nie.
FERMENTEERPOT Jy het nié ’n spesiale fermenteerpot of vreemde toerusting nodig om kos te fermenteer nie, maar ’n anaërobiese omgewing (dus sonder enige suurstof ) is ononderhandelbaar.
Natuurlik sal ’n fermenteerpot hierdie taak vergemaklik, want jy vul eenvoudig die gleuf in die borand van die pot met olie (of water) om ’n lugdigte seël te skep wat sal sorg dat die natuurlike koolstofdioksied wat aan die binnekant opbou, vrylik kan ontsnap sonder dat enige suurstof die pot binnekom. Platteland het met ons eksperimente agtergekom olie is ’n veel beter keuse om hierdie lugdigte seël te skep, want veral in fermenteerpotte met ’n redelike vlak gleuf verdamp die water binne ’n dag en word die seël gebreek.
Indien jy dus ’n doodgewone 1 ℓ- 2 ℓ- of 3 ℓ-glasfles gebruik met ’n deksel wat jy styf toedraai, moet jy dubbel seker maak die groente bly te alle tye onder die pekelwater (deur dit byvoorbeeld met ’n koolblaar, ’n groot genoeg plastiekdeksel en/ of gewigte onderdompel te hou) sodat die melksuurbakterieë kan floreer en ongewenste bakterieë of swamme nie posvat nie. Van die derde of vierde dag af sal jy ook elke dag die deksel vinnig moet losdraai om die koolstofdioksied wat binne opbou vry te laat.
ANDER TOERUSTING Gebruik altyd bakke, lepels, maatbekers, siwwe en ander toerusting wat van glas, keramiek, plastiek of hout gemaak is. Moet nooit toerusting van vlekvrye staal of aluminium gebruik nie.
GROENTE
Gebruik altyd vars, organiese groente. Was dit goed af in ’n flou soutwateroplossing (1 eetlepel per liter water) en skud dit droog. Gooi ’n paar blare wat tannien bevat (soos groentee- of wingerdblare) by die pekeloplossing of sny ’n vel seegras (nori) in die regte grootte en gebruik dit onder die gewigte (of koolblaar) om seker te maak die groente bly lekker bros.
Groente wat gefermenteer kan word, sluit in: beet, blomkool, brandrissies, broccoli, Brusselse spruite, gemmer, groenbone, knoffel, komkommer, krulkool, pak choi, preie, radyse, seegras, soetrissies, uie en wortels. Sekere groente, soos komkommers en soetrissies, is geneig om maklik te muf en moet dus in ’n sterker soutoplossing gefermenteer word. Lees meer daaroor by healthessentials.co.za/fermentation
WATER
Kraanwater is uit! Gebruik slegs skoon gefiltreerde kraanwater of gebottelde water wat so min as moontlik (of geen) chloor bevat nie.
SOUT
Sout – en, belangrik, ons praat hier van seesout, rotssout of himalajasout sonder enige jodium of byvoegings om klontvorming te keer – verbeter die geur, tekstuur en raklewe van gefermenteerde kos, en jy kan dit aanpas na gelang van persoonlike smaak. Die aanbevole hoeveelheid is 2-3 eetlepels (30-45 ml) sout per liter water. Goeie handelsmerke om te gebruik is Oryx en Khoisan. >