Melk-kefir
Melk-kefir is ’n redelik loperige gefermenteerde melkdrankie propvol antioksiante, vitamien K12, B-vitamiene, magnesium en kalsium. Dit lyk en ruik soos karringmelk met ’n redelike skerp, suur smaak wat baie mense laat besluit jogurt is lekkerder! Dis veral lekker in smoothies of saam met vrugte en muesli.
Maak 500 ml Bereidingstyd 2 minute, aktiveringstyd uitgesluit
Fermenteertyd 1-2 dae
JY BENODIG
• geaktiveerde gedehidreerde kefirkorrels
(lees die wenk hiernaas)
• 2 koppies vars volroomkoei- of bokmelk (die kefir teer op laktose – as jy dus klapper-, soja- of rysmelk wil probeer, sal jy steeds jou kefir elke tweede keer van koei- of bokmelk moet maak om die korrels weer te voer)
SÓ MAAK JY
Gooi die geaktiveerde kefirkorrels en die melk in ’n glasfles, maak die bokant toe met ’n stukkie kaasdoek en ’n rekkie, en sit dit op ’n louwarm plek (20-25 ºc) buite direkte sonlig om te verdik en suur te word – dit behoort binne 24 uur te gebeur.
Gooi die mengsel deur ’n plastieksif. Bêre die kefirmelk wat deurloop in die yskas en gebruik dit binne 7-10 dae. Die korrels wat in die sif agterbly, kan gebruik word om ’n volgende fles kefir te maak.