Rou, organiese appelasyn

Baie kommersiële appelasyn word gedistilleer, gefiltreer en selfs verhit, wat heelwat van die gesondheidsvoordele uitwis. Ons is geïnspireer deur ’n resep op die blog tales ofakitchen.com – en ja, dit is verbasend maklik om jou eie appelasyn te maak, maar jy sal geduldig moet wees, want dit gaan maklik 6 weke tot 2 maande neem.

Maak omtrent 800 ml Bereidingstyd 5 minute Fermenteertyd 2 maande+

JY BENODIG

• 6 geurige klein appels (verwyder die stingeltjie, maar los die klokhuis en skil)

• 1 eetlepel (15 ml) rou suiker (ons het

sommer ligte bruinsuiker gebruik) • gefiltreerde water

SÓ MAAK JY

Was die appels en sny elkeen in omtrent 12 stukke. Plaas dit in ’n gesteriliseerde glasfles.

Meng die suiker met 1 koppie (250 ml) water en gooi dit oor die appels. Voeg nou nog gefiltreerde water by om die appels te bedek en gebruik ’n plastiekdeksel, piering of koppie om seker te maak dit bly onderdompel in die water. Bedek die bek van die fles met ’n stukkie lap en ’n rekkie en laat dit vir

2-3 weke op ’n warm, donker plek staan. Dit sal met verloop van tyd borrel en selfs skuim bo-op vorm.

Gooi die effens melkerige mengsel ná omtrent

3 weke deur ’n plastieksif of -vergiettes, gooi die appelstukke weg en gooi die vloeistof dan terug in die fles. Sit weer die lap op en laat dit nou vir nog

4-6 weke staan. Roer dit af en toe met ’n lepel en proe. Wanneer jy van die smaak hou, kan jy dit bottel. >