Wynasyn
Om jou eie wynasyn te maak het jy ook ’n moeder nodig (wat lyk soos die scoby wat jy vir kombucha benodig) en afvalbietjies wyn. Asynmoeders is nie iets wat ’n mens in winkels raakloop nie, maar Platteland het einde 2018 ’n wit- én rooiwynasynmoeder by die Franschhoekse sjef Margot Janse gekry wat sedertdien al etlike “babas” gemaak het.
Bereidingstyd 2 minute Fermenteertyd 2 maande+
JY BENODIG
• asynmoeder
• oorskiet-wit- of rooiwyn (óf gebruik
vonkelwyn vir die witwynmoeder)
SÓ MAAK JY
Dis regtig die maklikste ding op aarde: Plaas die asynmoeder in ’n groot glasfles met ’n kraantjie (die soort waarin pons of water voorgesit word by partytjies) en gooi omtrent ’n bottel wyn by om mee te begin. Vir witwynasyn moet jy vir elke bottel wat jy bygooi, ook ’n koppie gefiltreerde water byvoeg. Maak die fles aan die bokant toe met ’n stukkie lap en ’n rekkie sodat dit kan asemhaal.
En dis regtig dit: Jy wag maar, tap elke dan en wan ’n druppel in ’n teelepel om te proe, en elke keer as daar ’n bietjie wyn onder in ’n bottel oor is, gooi jy dit by.