Maak jou eie spekboom-en-wortelatjar
Die inheemseveldkoskenner Loubie Rausch sê sy het oor die jare met verskillende resepte geëksperimenteer en dit aangepas met inheemse veldkosse. “Dié resep is ’n aanpassing van ’n wortelpiekelresep uit die ikoniese resepteboek Indian Delight, wat vele geslagte tuis- en professionele kokke geïnspireer het. Spekboom werk baie goed vir dié piekel omdat hulle heldergroen blare en die oranje van die wortel so mooi saam lyk, veral net nadat jy dit ingemaak het.” Die blare verloor wel van hulle kleur namate die piekel verouder.
JY BENODIG
• 2 kg wortels, in dun ringe gesny • 500 g spekboomblaartjies
• 20 kerrieblare
• kookolie vir braai
Mengsel 1
• 2 eetlepels rissievlokkies – gebruik meer
as jy van ’n byt hou
• 1 koppie (250 ml) sultanas
• 1 koppie (250 ml) wit sesamsaad
• 1 koppie (250 ml) fyn klapper
• 190 ml kookolie
Mengsel 2
• 1 eetlepel (15 ml) heel komynsaad
• 2 eetlepels (30 ml) sesamsaad
• 2 eetlepels (30 ml) swart mosterdsaad
Mengsel 3
• ¾ koppie (180 ml) mielieblom
• 2 koppies (500 ml) water
• 4 koppies (1 ℓ) witwynasyn
• 2 eetlepels (30 ml) sterk Engelse
mosterdpoeier
SÓ MAAK JY
Maak mengsel 1 Pols die rissie, sultanas, sesamsaad en klapper saam in ’n voedselverwerker sodat die sesamsaad en sultanas effens stukkend geslaan word. Verhit die olie in ’n kastrol wat groot genoeg is vir al die bestanddele van die resep en braai dan die sesamen-klappermengsel tot dit geurig en lekker neutagtig is.
Maak mengsel 2 Terwyl mengsel 1 afkoel, braai die komyn en sesam- en mosterdsaad in ’n droë pan tot dit ook geurig is. Voeg dié mengsel nou by mengsel 1.
Maak mengsel 3 Meng die mielieblom met genoeg water sodat dit ’n gladde smeer vorm. Roer dié smeer dan by die res van die water, voeg die asyn by en verhit die mengsel in ’n kastrol. Roer die heeltyd tot dit verdik. Laat dit effens afkoel voordat jy die mosterd byvoeg. Roer alles weer goed saam.
Gooi mengsel 3 nou by die ander mengsel, en roer dan die wortel en spekboomblare by.
Verhit ’n bietjie olie in ’n pan en temper die kerrieblare daarin tot dit geurig begin raak. Voeg dit by die gekombineerde mengsel en roer alles goed deur.
Lê die atjar in gesteriliseerde flesse in. Druk die mengsel goed af sodat enige lug ontsnap en die vloeistof styg totdat dit die piekel in die fles bedek. Laat die piekel vir minstens twee weke staan voordat jy dit geniet.
Loubie is die eienaar van Making KOS, en haar groot liefde is om mense te leer kook met plaaslike inheemse veldplante van die Kaapse blommeryk . Bespreek gerus vir een van haar kookklasse. Making KOS
makingkos.blogspot.com