Beet-en-mieliekoekies
Werk versigtig, want rou beet is moeiliker om te rasper as wanneer dit gaar is. Jy kan dit ook in ’n voedselverwerker fynkap.
Maak 20 koekies (genoeg vir 4-6) Bereidingstyd 10-15 minute Baktyd 10-15 minute
JY BENODIG
• 150 g beet (omtrent 2), geskil en gerasper • 150 g wortel (omtrent 2), geskil en
gerasper
• 1 gaar mielie, pitte van die stronk afgesny • 2 sprietuie, fyngekap
• 1 klein rooiui, fyngekap (opsioneel)
• 2 teelepels (10 ml) fyngekapte vars dille
• 4 teelepels (20 ml) vars koljanderblare, gekap
• ½ koppie (125 ml) bruismeel
• 1 mespunt bakpoeier
• ½ teelepel (2,5 ml) sout
• 3 ekstragroot eiers, geklits
• 100 g fetakaas, gekrummel
• olie vir vlakbraai
• tzatziki en groen mikrokruie van jou
keuse om voor te sit (opsioneel)
SÓ MAAK JY
Meng die beet, wortel, mieliepitte, sprietui, rooiui, dille en koljanderblare.
Sif die meel, bakpoeier en sout saam en roer dit by die groente. Roer die eier en fetakaas by en geur dit na smaak met ekstra sout en varsgemaalde swartpeper.
Verhit die olie en braai lepels vol van die beslag in die warm olie. Braai die koekies tot dit alkant goudbruin is en laat dit op kombuispapier dreineer. Sit die koekies voor met tzatziki en garneer dit met mikrokruie. >