Soutige kaaskoek met tuisgerookte hoender en beet
Vir hierdie uithanggereg gaan jy sélf die hoender in ’n platboomswartpot rook.
Genoeg vir 6-8 Bereidingstyd 20-30 minute Gaarmaak- en baktyd 1½ uur
JY BENODIG
VIR DIE KORS
• 140 g Provita-beskuitjies
• ¼ koppie (60 ml) gesmelte botter
• 100 ml (40 g) fyngerasperde parmesaan
VIR DIE VULSEL
• 6 hoenderdye
• 300 g rou beet (omtrent 4), geskil
en in klein blokkies gesny
• 1 bossie sprietuie, gewas en in
dun skyfies gesny
• 1 koppie (230 g) roomkaas
• 1 koppie (250 ml) mascarpone
• 6 ekstragroot eiers, geklits
• 200 g fetakaas, gekrummel
• 100 g bloukaas of gorgonzola, gekrummel
VIR GARNERING • ertjierankies (pea shoots) • parmesaanskaafsels
SÓ MAAK JY
Verhit die oond tot 180 ºc. Plaas die beskuitjies, botter en parmesaan in ’n voedselververwerker en pols tot dit soos krummels lyk. Druk die krummels met jou vingerpunte op die boom en teen die kante van ’n 22 cm-veerklamppan vas. Sit dit in die yskas.
Rook die hoender Hiervoor het jy nodig ’n platboomswartpot, houtskaafsels,
’n klein ronde draadrakkie en ronde blikbord wat in die pot pas. Geur die hoender met sout en varsgemaalde swartpeper na smaak. Versprei ½ koppie (125 ml) houtskaafsels oor die boom van die swartpot, sit die draadrakkie bo-oor, gevolg deur die blikbord. Sit die hoender op die blikbord en drup ’n bietjie olyfolie oor.
Bedek die pot met foelie, sit die deksel op en sit die oondplaat aan op hoog. Rook die hoender vir 15 minute en verlaag dan die hitte tot matig. Rook dit vir nog omtrent 10 minute. Indien die hoender nog nie gaar is nie, kan jy dit uitskep in ’n bakkie en dit in die warm oond rooster tot gaar.
Maak die vulsel Skil die beet en sny dit in klein blokkies. Verwyder die vel en bene van die hoender en sny dit in klein stukkies. Pak die beetblokkies, hoenderstukkies en sprietuie in die tertkors.
Klits die roomkaas, mascarpone en eiers saam tot dit ’n gladde mengsel vorm. Roer die feta- en bloukaas by die eiermengsel en geur dit na smaak met sout en varsgemaalde swartpeper. Giet die eiermengsel oor die beet en hoender, en bak die kaaskoek vir omtrent 1 uur tot gaar. Laat dit dan vir minstens 2 uur rus voor jy dit verwyder en op ’n mooi opdienbord sit.
Sny die kaaskoek in skywe en garneer dit met ertjierankies en parmesaanskaafsels.