Blitsplanne met beet

BEETTJIPS Gebruik ’n rasper of mandolien om rou beet in baie dun skywe te sny. Verhit kookolie en braai die beetskyfies daarin tot gaar en bros. Laat dit op kombuispapier dreineer en sit dit voor op ’n burger of as deel van ’n kaasbord.

BEETSAP Versap vars beet en wortel saam met vars gemmer en ’n appel en lemoen. Hou dit in die yskas.

BEETMAYONNAISE Roer ’n bietjie gaar beetpuree en ’n lepel of twee dijonmosterd by gekoopte of tuisgemaakte mayonnaise.

BEETSLAAI Meng skywe rou beet, gesnipperde rooikool, perske- of pruimskywe, oopgebreekte vars vye, dun repies rooiui en gekapte pekanneute en kikker dit op met ’n balsemiekasynslaaisous.

BEETSAGOPOEDING Kook rou sago in ’n mengsel van appelsap en water tot dit gaar is. Roer ’n puree van gaar beet en klappermelk by en sit dit voor met kaneelsuiker.

KITSBORSCHT Verpulp ’n boksie Werdagerasperde beet (of ’n pakkie van Ina Paarman se geroosterde beet) saam met 2 koppies (500 ml) karringmelk. Geur dit na smaak met sout en varsgemaalde swartpeper en garneer dit met fyngekapte vars pietersielie.