Skaapboud in ’n pasteikors
Gemeenskapsresepteboekies fokus gewoonlik op vinnige, maklike en ekonomiese vleisgeregte, maar vir spesiale dae en Sondagetes word die “onthou jy nog”-resepte uitgehaal. Soms kry die herinneringskos ’n nuwe baadjie, soos dié skaapboud wat toegewikkel word in ’n traliewerk van deeg.
Genoeg vir 8-10
Bereidingstyd omtrent 30 minute Gaarmaaktyd omtrent 4 uur
JY BENODIG
VIR DIE SKAAPBOUD
• 1 ontbeende skaapboud van 2-2,5 kg • 1 knoffelhuisie, fyngedruk
• 1 teelepel (5 ml) worcestersous
• 1 eetlepel (15 ml) bruinsuiker
• 2 heel naeltjies
• vars of droë tiemieblaartjies na smaak • 2 uie, in ringe gesny
• 1½ koppies (375 ml) vleisaftreksel
VIR DIE PASTEIKORS
• 2 rolle (200 g elk) blaardeeg, ontdooi • heel naeltjies
• 1 eiergeel
• 2 eetlepels (30 ml) melk
SÓ MAAK JY
Verhit die oond tot 180 ºc. Sit die boud in ’n oondpan, geur dit met sout en varsgemaalde swartpeper en voeg die res van die bestanddele by. Bedek die pan met swaar aluminiumfoelie en bak die boud vir 2-3 uur. Haal die foelie af en bak dit vir nog 30 minute. Laat die boud op ’n draadrak dreineer en afkoel. Hou die pansappe om ’n sous te maak. Verhoog die oondtemperatuur tot 200 ºc. Rol een deegrol effens dunner uit op ’n werkoppervlak wat met meel bestrooi is. Vou die deeg versigtig om die gafgekoelde gaar boud en verf die rande met water om die deeg te verseël. Sit die toegevoude boud met die naat na onder op ’n gesmeerde bakplaat of oondpan.
Rol die ander deegrol uit, sny dit in lang repe en vleg ’n traliepaneel oor die toegevoude boud. Verf die deegrepe met water om dit te heg.
Druk ’n heel naeltjie in elke kruising. Klits die eiergeel en melk met ’n vurk saam en verf dit oor die deeg. Bak dit vir 40–60 minute tot goudbruin. Verdik die vleissous en sit dit apart voor saam met die parmesaanaartappels.