Kookwater planne met brandnetels

Dié tyd van die jaar kan brandnetels (Urtica dioica) omtrent rammetjieuitnek raak in die tuin, vernaam in die winterreënvalgebiede. Hierdie oeroue geharde plante kom voor in die meeste gematigde klimaatstreke van die wêreld waar mense aktief is.

Al word brandnetels as “algemene onkruid” geklassifeer, word dit ook al eeue lank as kos, geneesmiddel en vir die vervaardiging van klere gebruik. Brandnetels bevat ’n magdom vitamiene, minerale en chlorofil, en wyle Margaret Roberts het dit geloof as “een van die beste middels wat nóg ontdek is om jig en artritis te behandel”.

Ons het ’n paar lekker wenke en voorstelle uit haar boek Plantmaats (Briza, 2007) probeer en toe met ’n klompie internetresepte geëksperimenteer om ’n romerige grasgroen brandnetelsop met patats te maak. (Moenie ons kosstorie oor patats op bl. 102 misloop nie.)

PLANT DIT

Kap stukke van die moederplant af en plant die nuwe plantjies in volson, sowat 1 m uitmekaar in komposryke grond wat diep omgespit is. “Vergeet dan van die plante, verwaarloos dit en moenie eens aan hulle dink nie – hulle floreer en oorleef.”

In die groentetuin sal brandnetels aartappels, tamaties en peperwortel oorvloediger laat dra, terwyl dit naby radyse en soetrissies, ment, salie en marjolein die smaak sal verbeter.

OES REG

Dra altyd lang handskoene en gebruik ’n snoeiskêr as jy brandnetels oes. Sny net die jong, vars blare en puntjies as jy dit gaan eet of tee maak.

Die goeie nuus is as die netels jou dalk brand, sal dit jou lui bloedsomloop laat spoed optel. Smeer

’n jel van aalwyn of balsem kopiva (Bulbine frutescens) aan die brandplekke tot die brand weggaan.

KOMPOSAKTIVEERDER

Gee grond of ’n komposhoop ’n turboinspuiting deur lae brandnetel, grassnysels, geharkte blare en mis op ’n hoop te maak met genoeg water daarby. As jy dit reg doen, kan jy binne agt weke met ’n vars hoop kompos sit.

PLANTKOS EN PESWEERDER

Maak ’n emmer driekwart vol brandneteltakkies en gooi ’n emmer vol kookwater oor. Laat dit heeltemal afkoel voor jy dit dreineer. Jy kan sukkelende plante natgooi met die tee om hulle weer woema te gee, of jy kan dit as blaarvoedsel gebruik wat ook sal help om peste natuurlik die hasepad te laat kies.

GESONDHEIDSTEE

Laat ’n kwart tot ’n halwe koppie vars brandnetelblare vir 5 minute in ’n koppie kookwater trek, gooi dit deur ’n sif en drink dit stadig. Dit help glo vir artritis, jig, katar, waterterughouding, verminderde nierfunksie, nierstene, obstruksie in die blaaspype, hoë bloeddruk en inflammasie. Dit is ook nie-allergenies en sal hooikoos verlig en opklaar.

Die kruiekoningin sê vir chroniese toestande kan ’n mens 1 koppie tee per dag drink (in akute gevalle 3-5 koppies), maar nie vir langer as 4-5 dae nie.