‘Gin’ minus die alkohol
Geharde apostels van die Mother’s Ruin-kultus sal sê ’n mens kry g’n so ’n ding soos alkoholvrye jenewer nie, maar Vermont bemark sy 200 mlbotteltjies Bloom en Limon eerder as Suid-afrika se eerste nie-alkoholiese “premium distilled botanicals”. Tog stel hulle op die verpakking voor jy geniet ’n 25 ml-sopie, nes die ware Jakob, saam met tonikum en ys – en, soos deesdae die mode is, na hartelus gegarneer.
Ons dink dit is ’n gawe opsie vir mense wat nie alkohol wil of mag gebruik nie, al kos dit ’n stewige R299 per bottel wat 8 sopies bevat.
Dié breinkind van Theresa en Stof Mouton van die Overbergse kusdorp Vermont boer behoorlik vooruit: Hulle produkte word reeds na Australië en die Seychelle-eilande uitgevoer; Europa en die Midde-ooste volg binnekort; en sedert Oktober 2019 vervaardig hulle ook 330 ml-botteltjies Virgin Mojito en Virgin Lavender Cosmo wat jy dadelik kan drink (albei kos R960 vir 24 met gratis aflewering in Suid-afrika op die
webwerf ).
KONTAK
Vermont Vergin SA @vergin_sa sales@ verginsa.co.za verginsa.co.za
Ons kon nie dié boksie Secco Drink Infusion in die geur Raspberry Rose Hibiscus weerstaan nie. Elke boksie bevat 8 sakkies (van 2,8 g elk) met ’n geurige mengsel van vriesdroogvrugte en speserye waarmee jy in ’n ommesientjie kleur én geur aan ’n G&T, skemerkelkie of koeldrank kan verleen.
Die geur wat Platteland gekoop het (foto hiernaas), bevat 45% vriesdroogframbose, 32% droë Hibiscus sabdariffablomme en 23% droë rose waarby geen kleur of geurmiddels gevoeg is nie. Die drie ander geure is Ginger Lime (droë gemmer en lemmetjie plus kaneel), Pepper Berry (droë aarbeie en bloubessies met swart en pienkpeperkorrels) en Spiced Pomegranate (steranys, gedroogde granaatpitte, kardemom en droë skoenlapperertjieblomme).
Dié geurgoed is die skepping van die Kaapse voedselwetenskaplike en produkontwikkelaar Wessel Pieterse en word vervaardig deur sy maatskappy, Tastelab. Dit is te kry by takke van Liquor City, Bar Keeper en Tops! at Spar, of bestel dit aanlyn by
yuppiechef of takealot.com
KONTAK
tastelab.co.za Secco – Drink Infusion secco_infusion wessel@ab.co.za 083 655 5298